Jo dycki moim synkom godała tak: pamiyntejcie cobyście wicow ło szwigermutrze niy godali, choćby niy wiym jak wos by jynzor świyrzbioł, bo to je mamulka łod waszyj baby i tak to bez gupota możecie se u łobuch nagrabić niypotrzebnie! Przoć tyj babie niy musicie, ale szaconek sie i dycko noleży, bo wasza nojmilejszo procnie wychowała.
Jedyn moj synek sie już szejś lot nazod łożynił, ale dobrze trefił, bo szwigermuter mo dobro a wielce modym pomocno i na nia niy norzyko, ale te łostałe dwa gizdoki, to som jeszcze karlusy do wziyńcio i jak sie gibko kole jakich frelkow niy zakryncom, to potym bez bryle do kolybki zaglondać bydom, jo mamulka, im to wroża!
Jo tyż je szwigermutrom już dość pora lot, a wiym, że mie moji „nowe cery a synki” fest se cyniom, bo jak żech sie rozchorowała, to mi dycki pomogali a jak było trza, to mie nawet i daleko do doktora zawioźli autym, poświynconego czasu a piniyndzy nigdy niy żałowali ,ale łoni tyż zawdy mogli na mie liczyć, jak trza było łobiod nawarzić, bajtla przypilnować, abo ze szkołki do dom przikludzić. Tak to już we familiji je – trza se pomogać!
Niy myślcie se że to je lekko być dobrom szwigermutrom, to je kupa roboty, ale przede wszyskim nad sobom! Nikedy trza łoko prziwrzić, chocio nom sie niy widzi to, co modzi robiom, do wychowanio dziecek sie niy wstyrkać, synowej niy poprawiać, choćbyście to sami lepi zrobili, nikedy dobrze je udować ślepo a gucho, coby sie miyndzy modych niy wstyrkać…Sami byście tu jeszcze wiela mogli dopisać, pra?
Za modych lot miałach przibytno somsiadka, coby mogła być mojom mamulkom. Roz - dwa my sie skamraciły, bo to była łogromnie mondro baba. Miyszkała ze cerom a ze ziynciym, ale łona śnim dobrze żyła, nic mu nigdy niy wyczytowała, bo cyniła tako zasada: uwielbiam zięcia dla swego dziecięcia!
Komentarze