– Jużeś jest nasz bratku! – padoł Hanek i roztwarty „futerzak” pod nos mu ciśnie. Jak siwek se chcioł trocha łowsa szkubnyć, Zefek mu drabko na łebsko miech zawcierzył i powroz na kark mu zaciepnył. Rącz yno siwek powroz na karku poczuł, zarżoł głośno: hiii... hi...!, zadkiym sie ku nim łobrociył i łobydwóch kopytami pogłoskoł. Hankowo karbidka furgła do gory choby jako raketa i głośno do wody plompsła. Zarozki sie cima zrobiyło, yno gwiozdy im w łepach świyciyły. Jak sie spamiyntali, to siwka już przi nich niy było. Stoła kole nich jakoś łoszkliwo pokraka w czerwionym szakecie. Jednom rynkom syjmuje tyn zaciepnyty miech, a w drugij trzimie „futerzak” z łowsym, na karku hanzlikow powroz przeciepnyty. Jak symnyło to tyn miech, pokozały sie zielone szkuty na łepie, kere styrczały do gory ani sznitloch. Ślypska to tymu świyciyły choby te bergmańskie karbidki z blyndom. Był to nocyński utopek Szkuciok z Wody Rybnickij, kery sie teraz do nich odezwoł jeszcze bardzij, niż som jest łoszkliwym głosym:– Zachciało sie wom nowego konia do roboty na dół, pra? Jo wom go z łepy wybija! Keby niy te szkaplyrze na karkach, już by po was było! To was yno retło!Jak to pedzioł, zarozki sie pod woda zapod i tela go widzieli!Hanek mioł trzi żebra połomane i dechu dopaść niy poradziył. Zefek? Lepij niy godać, dostoł kopytym w słabizna. Niy poradziył w doma galot symnyć, chocioż mu Angelka przi tym pomogała. Potym mu to przez miesiąc kapołkom i babskim listkiym obkłodała, a przed babami w sklepie sie użolała, że musi teraz ło brusku być. Zefek jom yno pocieszoł:– Mosz szczyńści, babeczko! Mogło być gorzij, yno pół szpany brakowało, a byłabyś cołki czas ło brusku!Na grubie nic, yno o nich szła godka i o tym koniu, kery ich moresu nauczył. Żodyn niy wiedzioł, że to tyn przejynty Szkuciok tak ich załatwiył.Jak prziszli do roboty, to ich kamraci wielkim plakatym witali. Był na nim siwy koń namalowany i wielkimi literami stoło:„Witomy tych, kerzi do miecha siwka chytali i przi tym po kulimyntach dostali”.Od tego czasu chopy godali, że na „Siwce” robiom, niy na Ryjmergrubie.Zefek sie musioł od gańby na „Emagruba ” przeniyś, bo jak sie kompoł we warzicie pod brauzom, przichodziyli chopy łoglondać, eli mu rychtyk czegoś niy brakuje. Baby z holc-placu i płoczki tyż sie za jego plecami chichrały.Hanek zaś se nic z tego niy robiył i przerobiył na „Siwce” do pynzyje. Jak sie na nia dostoł, to se zrobiył kobylica i strugoł na nij klompy i pantofle z lipowego abo olszowego drzewa. Potym po wypłatach stowoł z tym pod grubskom bramom i bergmonom sprzedowoł. Chopy kupowali te holcoki, bo były fachowo zrobione i tonie. Godali ludzie z Niedobczyc, że piyrszo pora tych klompow kupiył od niego Szkuciok, chcioł sie Hankowi przichlybić za te porachowane kości, kere go teraz na starość targały na kożdo zmiana pogody.Tak to było z tym siwkym, kery gruba przemianowoł. Niy wiedzioł yno tego, że kedyś i łona sie sromotnie na nim pomści.Po drugij wojnie światowyj, jak nastali te „wiścigowce” i „przodowniki”, kerych fotografek pełno wisiało w gablotach przed rybnickim dworcym, to tak dziwoko zaczli fedrować, że niy trwało długo, jak cołko Woda Rybnicko zasolyli i zaszlomiyli.Borok Szkuciok bez mała – wol, niy wol – na Gzel sie musioł przekludzić.
Komentarze