Po naszymu
Po drodze z gorow wdepłach do moji kuzynki, co miyszko wele Chybio a mo wielgo gospodarka. Maryjka ze Zefkiym chowiom kaczki a gynsi, bo za chałpom majom aż trzi wielgi stawy. Jak my jechali do dom dali nom zabito a łoszkubano kaczka do swojego krześnioka, co miyszko wele nos, zaroz za płotym. We Żorach jo zaroz ta kaczka przekozała jego babeczce, a łona sie uradowała, że bydom mieć na łobiod kaczka ze pomarańczami. I wiycie, że mi smaku narobiła, bo jo pora dni przed tym znodła we babskij gazecie taki som przepis! Yno, że do tego potrza świyżej kaczki a niy mrożonej, co som u nos we kożdym markecie.
Na drugi dziyń rano, zaroz po śniodaniu, woło mnie mój chop:
– Podziwej sie babo, co sie tam u Grześka dzieje: łokno majom łotwarte, kurzi sie śniego niymiłosiernie, a śmierdzi jakby kery piyrze polił!
Już żech tam chciała lecieć, jednako za kwila sie łokno zawarło, bezto dałach se stym pokoj! Za jaki poł godziny prziszoł ku nom Grzesiek a przinios jakoś sporo reklamowka.
– Cioteczko – padoł – niy gorszcie sie, ale jo niy wiym, co ze tom potworom zrobić?
– Ło czym to godosz synek? – jo dalij nic niy kapowała.
– No, ło tyj kaczce, coście jom wczoraj prziniośli łod potki!
Wsadził rynka do reklamówki a we kuchni zaśmierdziało spolonym piyrzym.Teroz to jo sie kapła, ło co szło!
– Na przeca, ta kaczka była łoszkubano, co coście śniom pochali? – niy poradziłach sie nadziwić.
– Ja, ale piszczale wielgi miała i Zosia jom nad gazym łopoliła, a teroz to sie tego jeś niy do, bezto jo jom prziniosł, cobyście jom waszym psom uwarzyli!
Już żech na końcu jynzyka miała, że mie chce smrodym zarazić, ale żech sie zasztopowała, a padałach:
– Pokoż ta łopolono kaczka…
Grzesiek łostawił mi ta reklamowka a zaroz uciyk, bo sie śpiychoł bezmała do roboty! Jak żech jom rozpakowała fest śmierdziało, ale miynsa na tyj kaczce było kyns, bezto wyciepać było szkoda, a psom gowiydź niy służy! Łoroz spomnioł mi sie jedyn przepis na kaczka łod naszyj starki, co we zomku warziła, podwiel pamiyntom mianowało sie to kaczka na dziko. Kaczka wymoczyłach, potym zielinami a solom natrziłach i zaniosłach do pywnice. Za trzi dni była w som roz na niydzielny łobiod!
GRYMLINO
Komentarze