Po naszymu
Pora lot nazod moja modo somsiadka wykludziła sie do Niymiec. Tam jeji chop dostoł dobro robota, a gibko prziszli do swojigo pomiyszkanio. Jak jeszcze łona zaczła robić we biurze na poczcie, to ich było stać postawić se mało chałpka we nowym łosiedlu. Wielki to niy było, ale łoni łoba ze chopym niy byli pragliwi i zatym im to stykło. Jednako jejich dwie cerki, te sie niy rade przekludzały, bo w nowym miejscu żodnych kamratek ni miały, bezto łojcowie padali, że kupiom im psa abo kota! Już jednego razu mieli jechać do sklepu, kej na jejich plac prziszoł jakiś mały, czorno-bioły kot. Ze początku chycił sie niy doł, a spowoł na werandzie, ale potym go dziołszki namówiły, coby wlozł do chałpy.
Łokozało sie, że je to koczka, to i dali na miano Kicia! Niymcy, co wele nich miyszkali, mieli na ta familijo ze wiyrchowiska, bo łoni niy zawiyrali koczki, yno jom do zegrodki puszczali, jak chciała iść polotać. Jedyn roz koczka wylazła na noc, ale do rano niy prziszła i łostała na dworze, kej łojcowie do roboty a dziecka do szkoły poszli. Kole trzeci ta moja znajomo była nazod, a tu przed jejom chałpom zbiegowisko! Zaroz sie spytała, co sie stało? Chop ze czerwonego auta, co tam stoło, fest jom przeproszoł, a pokozoł i czorno-biołego kota, co go przed kwilom niychconcy przejechoł. Isto to musiała być jeja koczka, bezto już nic wiyncy niy godała, yno wziyna kota do kartona a szła śnim do dom, a tam sie dziepiyro rozpłakała, bo co dziołszkom teroz powiy, przeca to łona koczki rano niy zawrziła? Jak maluśkie prziszły, to był dziepiyro płacz a lamynt, a pod wieczor cołkom familijom, poszli kota pochować na zegrodka, a do gowy im ani niy prziszło, że tak sie niy śmi, bo nimiecki przepisy tego zakazujom.
Upłakane dziołszki poszły już spać, a łojcowie siedzieli jeszcze we kuchyni, łoroz słyszom, że cosikej dropie we dźwiyrze a głośno mrałczy. Baba sie wylynkała, a siedziała jak skamiyniało, ale chop skoczył ku dźwiyrzom, łotworził, a potym łośmioł sie na cołko gymba:
– Mamulko – padoł – Nasz kot zmartwystoł!
Do izby wlazła jejich Kicia z myszom we pysku! Zaroz łoba polecieli na zegrodka, ale tam było wszystek jako przodzi!
Grymlino
Komentarze