Betlejymsko gwiozda a łostrokrzew

Miejscami nawet chojinka (krisbaum) zastympuje, samach widziała we jednym szałfenstrze ta poinsetia szklanymi kulkami łobwieszono. Gwiozda to niy je, no ale jak by sie kery uprził, toby i tak szło pedzieć! Ta moda prziszła ku nom ze Ameryki a do nich isto trefiła ze Australije, kaj ta roślina na dziko rośnie. We Australiji, kaj miyszko tyż nasza familijo, Godni Świynta przipadajom bez lato. Niyroz je taki war, że wytrzymać niy idzie! Jak my im posłali kejś fotografije ze Wiliji, to im było żol, że ni majom śniega a chojinki a swoim dzieckom łobiecali, że jak przilecom do Polski to im gory a śniyg pokożom! Ale uradowali sie, jak uwidzieli na naszym stole dobrze im znano poinsetia. To było doś pora lot nazod i te kwiotki niy były u nos jeszcze taki znane, ale wtynczos przijechała ku nom ciotka ze Anglie a kożdymu taki na gyszynk kupiła. My go zaroz na stoł postawili, ale cosikej mu niy pasowało, bo zaczły śniego listki slatować i na fotografiji były yno resztowki po tym piyknym kwiotku. Wtynczos mie ani do gowy niy prziszło, że taki piykny kwiotek może mieć w sobie gift, dobrze, że nasze koczki sie do ni niy dobrały, boby ich już dzisio niy było!
Tyn łostrokrzew to se isto spominocie, był na wszyskich kartach, co na Świynta łod ciotki ze Anglie prziszły. Tam kożdy Mikołoj mioł przi czopce taki zielone listki ze czerwionymi jagódkami. Teroz łostrokrzew mom na placu przed chałpom, ynoch sie tych kuleczek czerwionych niy doczkała, bo ku tymu muszom być aż dwa krzoki. Jak my go lampkami łostrojili ,to kożdy wieczor ludzie wele nos przistowali a dzieckom go pokazowali!
No to tela ło tej paradzie ze zagranice, bo my tyż momy sie czym pokwolić! Za moich modych lot małokery mioł kupne glaskugle a wszyski insze ciciridła na chojinka ludzie robili sami. Łojcowie kupili nom wylepianki i klyj, a prosto słoma to my se sami ze szopki prziniośli, a jaki fajne rzeczy my z bracikiym robili! Jeszcze nikere znajomki do dzisio nimi chojinka strojom.

2

Komentarze

  • Grymlino. Do Elisabeth 14 grudnia 2015 15:04Pani Elu, serdecznie dziękuję za ten ciepły komentarz i zapraszam do dalszej współpracy. A korzystając z okazji życzę Pani i Rodzinie najwspanialszych Świąt Bożego Narodzenia i samych sukcesów w Nowym 2016 Roku.
  • Elisabeth betlejymsko gwiozda... 13 grudnia 2015 15:55to sie u nas przed Bozym Narodzeniem dostaje.Zewsze ja mam w Adwencie-czerwona albo biala.A tak Pani pieknie pisze o starycz czasach,jak sie ozdoby na choinki samymu robielo...Ludzie nie mieli tyle pieniedzy i innych materialistycznych rzeczy-ale wtedy byli szczesliwsi i zadowoleni niz na dzisiejsze Swieta-bo to tylko stres i komercja...Fajne opowiadania-jak zawsze....

Dodaj komentarz