Wiela jeszcze łostało ze moji baby

Zaroz we antryju potkałach somsiada łod tych naszych znajomkow, co jo sie już śnim lata znom, a był jakiś markotny.
– Witom cie Alojziczku! – wypoliłach. – Ciesza się, że cie widza, yno czamu mosz tako strasznie markotno macha?
– Dowiysz sie, jak moja Krysia łoboczysz! – łodpedzioł. – Wiysz, co ta stwora napochała? – nerwowoł sie.
– Bezto wyglondo jak niyboski stworzyni, a jo już ani niy wiym, wiela na ni łostało z moji baby!
Choć to ni ma piyknie, jo już dali niy suchała, yno strzeliłach do kuchynie, kaj żech słyszała Krysia godać. Wele ni siedziała jeja siostra Bożyna, co już lata je we Angliji, a łosprowiały se jak by sie sto lot niy widzialy! Łobie baby były troszka „wczorajsze”, niy były wypite, yno, że miały resztowki sylwestrowej fryzury, wymalowane fest pazury, a trocha jeszcze tyj wieczornej tynktury, isto niy miały jeszcze czasu sie umyć, ale nic żech na nich strasznego niy spozorowała! Kwilka my pogodały, a jo poszła szukać starki Wroblinej, co mi łobiecała łopedzieć nowo bojka ło utopkach, ale dalekoch niy zaszła, bo Alojz dali stoł we antryju a czakoł na mie.
– No i co padosz? – spytoł się. – Ale widza, że dali nic niy wiysz! – rozhuloł się Alojz. – Ta małpica Bożyna przijechała na świynta, a zaczła Krysi we łebie miyszać! Wziyna jom do jakigoś sztylisty, niy wiym, co taki chop może babom pokozać? A nazod prziszła tako łobgryziono, że wiyrchni wosy mo krótsze jak te dolne, a wiysz wiela jom to szasło – dwiesta złotych, bo Bożynka łobiecała, ale niy zapłaciła, skuli tego, że tyn chop broł żywy piniondz, a niy ze karty! Krysia se jeszcze ku tymu pazury zrobiła na czorno (te Krysine pazury to jo widzała, ale łone były ciemno modre!) i jednego, tego pojstrzodkowego, zapomnieli i pomalować, tako fuszera!
No, tu to już Alojz przesadził: tyn pazur był piykny, bioły ze dyjamyntami, bryle by sie przydały!
A padajom: Nowy Rok jaki, cołki rok potym taki!

1

Komentarze

  • Stanik z Rybnika Baba 22 kwietnia 2016 16:03Baba łostała cołko jino wiele łostała ze jejigo geltaku. Brawo Grymlino .

Dodaj komentarz