Tak było we zeszły prima aprilis! Darek by isto takij łokazji niy przepuścił, ale jak tu kerego nabrać, jak wszyjscy, co go znajom, majom sie na baczności?! To by musiało być cosikej takigo, coby sie tyn istny niy kapnył! Darek kombinowoł cołki dopołednia i wykombinowoł! Zadzwonił do somsiadki, coby gibko przileciała do nich, bo jego baba Fridka przewróciła sie na izbie i leży, a łon niy wiy, co robić? Somsiadka łobiecała, że bydzie za kwilka, yno sie troszka łoblecze!
Jak tak godo – pomyśloł se Darek – to ekstra obleczono bez pole niy poleci yno drogom. To za tyn czos jo tam wyśla „moja” a powiym i coby leciała na przijmo, to sie babska minom! – a łośmioł sie fałszywie.
Wyjrzoł na zegrodka a zawołoł:
– Frida, dzwoniła Maryjka a padała cobyś i pomogła, bo spoliła sie i dorta, a za kwila mo gości, Gibnij sie!
Fridka pociepła kopaczka a poleciała na przijmo ku Maryjczynyj chałpie, bezto baby spotkały sie we poła drogi!
– Dziynki Bogu ty żyjesz Fridka, dziynki Bogu! – powtorzała uradowano Maryjka.
– A niby, co mi miałoby być? – dziwowała sie Fridka.
– No przeca Darek padoł, żeś na izbie padła a leżysz, bezto ci leca na pomoc!
– Ja, Darek, no to my som teroz w doma! – pokiwała gowom Fridka. – A mie padoł , że ci sie dorta spolyła, bezto wszystek pociepłach a leca ku ciebie!
– No ja! Dzisio momy przeca prima aprilis, a tyn gizd żodnyj prziwiliji do szpasów niy łominie! – łośmioła sie Maryjka, ale Fridka była fest wkurzono i padała, że to ni może przyńś Darkowi po suchu!
I łobie poleciały nazod ku Darkowej chałpie, ale łon ich ujrzoł bez łokno i zamiarowoł śmiyś a kaj sie skować, aż babom złość przyndzie, jednako za wiela szczyńścio ni mioł, bo go cylły jak loz do parzoka, kaj Fridka dymfowała zimioki do wieprzkow! Łona wleciała zaroz za nim, chyciła sztamfer, a chciała mu nim pogrozić, ale Darek sie wylynkoł, że mu liźnie bez łeb, bezto gibko łoddskoczył, a ujechoł przi tym na dymfowanym kartoflu, co leżoł na delinie! Wielgo grucza se na łebie nabił, a jeszcze se szłapa złomoł! To był ale szpas!
Komentarze