20042810
20042810


Festyn, żeby sie udoł i prziciongnył ludzi z cołkij wsi, musi być bogaty w rostoliczne atrakcje. Krom piwa, muzykantow, loteryje i inkszych szisbudow, muszą tyż być zabawy i konkursy. Tukej przipominajom mi sie te wszystki festyny, kere dycko miały miejsce nad stawami na Rudzie, tam, kaj dzisioj jest kompielisko. Był żech wtedy bajtlym i z mojimi rowniokami niy poradzili my sie doczekać na te wszystki konkursy, kere przi tyj sposobności sie odbywały. Czego to niy było – lotanie w miechach, spinanie sie po gładkim drągu po tytka szklokow na jego szpicy, wyścigi po sztyrech i tela inkszych rzeczy.Pamiyntom, wiela my mieli uciechy z takich konkursow i wspolnych zabaw, totyż od pora lot starom sie na fojermańskim festynie wynochwiać dzieciom rostoliczne zawody i konkursy.Nojprzod w udowaniu głosow zwierząt, do kerego zgłosiyło sie doś trocha synkow i dziołchow. Były głosy kokotow, krow, swiń, psow i kotow, ale wygroł synek, kerymu Wojtek było na miano i udowoł małupica. Musioł wygrać, bo jak zaczon małupica naśladować, to okoliczne psy tak zaczły ujadać, choby ich jaki duch Tarzana łobudziył.Nojwiynksze jednak zainteresowanie wzbudziył konkurs felgowy. Przipomniało mi sie, jak w latach piyńćdziesiątych my karowali po wsi starymi felgami z koła. Takim wykrziwionym hokiym sie ta felga pociskało, a tak sie to przijyno, że wszyńdzi było słychać bruszyni felgow. Butel przi tym był okropny, jak my cołkom chormijom miyndzy chałpami przejechali. Robili my miyndzy sobom wyścigi i pora klubow felgowych my we wsi mieli.Przinios żech na tyn festyn tako felga i hok z drotu, tak samo wykrziwiony jak jo go pamiyntom. Do konkursu zgłosiyły sie wszystkie synki i dziołchy, kere tyż chciały poprobować. Musioł żech im to nojprzod pokozać, co mi sie nawet po tela latach udało. No ja, godajom, że co sie człowiek roz nauczy, tego niy zapomni.Nojprzod dziołchy zaczły, ale im to nie wychodziło. Jednyj sie yno udało przejechać trzi metry tom felgom. Synki tyż z początku niy bardzo to umieli pochytać, ale kożdy dostoł trzi szanse. Rozchodziło sie o to, żeby jak najdalij tom felgom zajechać. Za trzeciom próbom nikerym udało sie przejechać doś wielki konsek, ale już nawrocić i nazod przijechać – niy bardzo.Nojwiynkszy śmiych jednak wzbudził we wszystkich wspomniany Wojtek. Jak za drugom próbom łapnył tyn knif i wysztartowoł, to wyjechoł poza ustalony teryn i sie nom z łoczow straciył. Dopiyro jak żech do cedzitka ryknył: „chytać złodzieja!”, to cołko banda synkow ruszyła za nim w pogoń.Dopiyro za jaki dziesiyńć minut przismyczyli go nazod z tom felgom, przi ogolnym śmiychu wszystkich zebranych ludzi.Synkom z Chwalyncic tak sie te bruszyni spodobało, że do samego ćmoka próbowali i jedyn drugimu ta felga z rąk wyrywoł. Pedzieli mi, że tyż założom we wsi klub felgowy, a jo im obiecoł, że na bezrok zrobiymy zawody w wyścigach felgowych.

Komentarze

Dodaj komentarz