– Dobrze, że cie dziołcho widza – padała – możnej mi co mōndrego poradzisz!
– Co tyż sie wōm stało starko? – dziwowałach sie trocha tyj tajymnicy.
– Ty se przedstow dziołcho, jo widziała tego drōna! – starce aże sie ôczy zaświyciły. – Ôn lotoł nad naszymi świytojōnkami tam a nazod!
– Jako to je, że sie starko na tym znocie, bo jo tako maszyna widziała yno we telewizorze…
– Wiysz, to wszystek pokozoł mi tyn mōj prawnuczek Wojtuś! Za to, że jo śnim we te gry ciupała, bezto wiym, jak tako maszyna wyglōndo!
– Ô toście sōm starko fest do przodku! – robiłach se troszka szpasy. – Jo yno wiym, że te maszyny poradzōm ludzi szpiegować! Na drugi roz to zwōńcie na policyjo!
– A ty myślisz dziołcho, że co jo zrobiła? – ôdpedziała – Tam jakiś mody panoczek bez kwilka suchoł, co mōm do powiedzynio, ale potym mu sie isto zdało, że coś bałamōnca, bo na mie ryknōł, cobych nojprzōd wyczyrstwiała, a potym dziepiyro na policyjo zwōniła! Padoł jeszcze, że ôn mi pōmōc wiyncy niy umi! Wiysz dziołcho, mie aże sztopło: niby taki panoczek władza, a taki gupi! A dzisio zaś tyn drōn był na zegrōdce, a lotoł ze śćwierć godziny, a potym sie kajś wytraciōł! No i co jo mōm robić? Wiysz co, jakbyś ty na ta policyjo zazwōniyła, bo ty sie lepszy wygodosz, co?
Niy chciałach starce ôdkozać, ale ô czym jo miała godać ze tym policjantym, jak jo nic niy widziała? Nojprzōd musiałach sie sama przeświodczyć! Ledwie my wlazły na plac a już sie dało słyszeć taki brzyncyni i tyn drōn tam był, a lotoł tam a nazod nad rajōm starczynych świytojōnkōw!
Już żech chciała zwōnić na policyjo, ale patrol sōm sie znod, bo ze drugi strony płotu ôpolała sie na słoneczku modo rechtorka ze naszego gimnazjōm! To ôna zazwōniyła, że keryś jōm tak tym drōnym napasztuje! Policjanty zaroz drōn zaaresztowali, a zaczło sie dochodzyni.
Ôkozało sie, że to starczyn prawnuczek ze kamratami tego drōna wyrychtowoł, a potym go wyprōbowywoł! Podziwejcie sie, jaki teraz dziecka sōm mōndre, a wrazidlate kaj niy trza!
PS Roztomili Czytelnicy, łod dzisio, podug tego, co mi poradzili szpece łod kodyfikacyje ślonskigo jynzyka ze stowarzyszynio Demokratycznej Unii Regionalistów Śląskich, zmieniom pisani nikerych liter, coby lepi dało sie ich wypedzieć po naszymu. Som to: „ō” /czytomy miyndzy o/u), a drugo – „ô”/wszyndy tam kaj sie downi pisało „ło”/. Napiszcie mi we komyntarzach, eli sie Wom, taki pisani bardzi widzi, a richtik lekcy sie Wom terozki czyto?
Komentarze