20043405
20043405


Trwało to doś długo, ale czas mi sie niy dłużył, bo zaroz kole tyj ławeczki jakiś chopy zaczli na takim sztandzie prezyntacyjo miksera, kery wszystko poradzi zrobić. Jak widza w telewizyji tako prezyntacjo, to zaroz przełonczom na inkszy kanał, ale tukej żech stanył i poszoł blisko, żeby wszystko usłyszeć. Chłop podobny do tego chrubego śpiywoka z Grecje wciepowoł nojprzod do tyj maszyny konski jabka, marchewki i inkszyj gymizy, a za chwilka już czynstowoł tych, co sie tymu prziglondali, dobrym sokiym. Mie sie tyż dostało skosztować, niy powiym, dobre było. Potym zaś porozbiyroł te klamory i jakiś inksze pozakłodoł i już za chwilka szatkowoł rostoliczne gymizy na szałot. Prziszła jakoś starka, keryj sie to podobało, i sztyjc sie pyto: – Wiela to mo kosztować, panoczku? Panoczek udowo że nic niy słyszy i dalij do tego miksera jakiś konski selera i ćwikle wali. Starka durch coroz głośnij woło: – Wiela to kosztuje? ale facet durch udowo, że niy słyszy. Może za czwortym razym już go chyba ruszyło, bo padoł: – Babciu! Kucharzowi sie nie przeszkadza przy pracy, bo może sobie palec skaleczyć. Na końcu prezentacji sie pani dowie...!Jo tyż se pomyśloł, przidołby sie w doma taki „kombajn”, ale jak babce niy pedzioł, to mie tymtuplym niy powiy.Stoł żech przez to ciyrpliwie, bo i tak mojij babeczki jeszcze niy widać i czekom do końca. Tyn pomager, kery tam podowoł te wszystki gotowe rzeczy, widzioł, że durch stoja, dowoł mi piyrszymu kosztować wszystko. Krom wspomnianego soczku dostoł żech ciepłyj zupki, mrożono kawa, majonez, ciasto do pomacanio (jak piyknie wyrobione) i na koniec lody z pozimek.Wszystko te maszkety poradziył tyn gość na tym cudownym „kombajnie” wyczarować. Godom wom, supermaszyna. Wszystko świyżutkie, smaczne i niy bardzo sie marasiyła ta maszyna – ani myć niy trza było. Myśla se tak po cichu, kupia to pierziństwo, to bydzie same w doma robić rostoliczne paskudy i babeczka sie wcale niy narobi. Teraz bez lato tela rostolicznego owocu i gymizow, bydymy se popijać soczki, lody robić i kawa mrożono bez ta hyca tyż by sie przidała.Możno wiyncyj jak poł godziny żech tam postoł, pomaszkeciył wszystkigo, ale durch niy słysza, coby padoł, wiela kosztuje taki cudo.Tyn pomager, kery mi do rynki dowoł te maszkety do kosztowanio, pyto sie mie w końcu: – Jest pan zainteresowany?Jo mu godom, że ja, jak nojbardzij. Toż wzion mie na bok, ku takimu stoliku, kaj tyn mikser stoł, i durch mi erkleruje, wiela tych klamorow dostana. Jo już niy wytrzimoł i godom: – Wiela to kosztuje?Niy umiało mu to przez gardło przelyść, ale w koncu padoł: 1750 zł, jak na raty, a 1600 gotowkom.Dobrze, że babeczka sie znojdła przi mie i wyretowała, boch sie niy umioł wydostać. Przeszła mie zaroz chyńć na świyży soczek i chyba byda dalij na tarle marchewka i jabka trził.

Komentarze

Dodaj komentarz