Ô starce niy-starce moi kamratki Bogusi

Wierzcie mi, roztōmili, że jo żech zgupiała, bo niby ta starszo baba to by mogła być starka, ale na te wszyjski starki, co żech znała wcale niypodano. Kecek niy ôblykała, yno piykne galoty, jakli tyż niy miała, yno bluzki z "degoltym", jako to godała nasza sōmsiadka Waleska, a nasza starka na taki szaciska a bluzki ôgrōmnie przezywała, że sōm bezwstydne!
Co te słowo znaczy, to jo już wiedziała – że gańby se idzie narobić, ale ône niy były taki straszne, jako nasze baby godały, yno piykne, tak mi sie wtynczos zdowało! Moja starka Elza czosała sie na gładko ze brōzdōm na pojstrzodku, a ze zadku miała dudlik zaplec i ōny, za to Bogusino mama miała dałerwele a łeb jak kosz, jako to nasze sōmsiadki godały, isto sie im jeja frizura niy widziała! A już nojgorsze były te mamine pazury na czyrwiono wylakowane, to była zgroza! Jeszcze ku tymu te mamine makijaże, co im wtynczos malowani gymby sie godało, to już przeszło wszelki pojynci, jednym słowym była to baba – kasper! A coby taki stworzyni było mojōm starkōm to jo bych niy chciała ani za cołki bogactwo tego świata!
Jednakoch dała pozōr, że nikere nasze starziki sie za niōm ôglōndali, ale jak co do czego prziszło, to tyż na nia kasper godali. Teroz se myśla, że sie im ta Bogusino starka widziała, bo to nowość była, yno sie swojich babeczkōw boli, coby im za to po gymbulce niy ôfackały! Czasami to mi było tyj Bogusie żol, bo ôna ku nōm rada przichodziła, możnej wiyncy skuli starki niż skuli mie, a jak sie kery pytoł, to dycki godała, że nasza starka Elza je jeja prawo starka, bo ôna była stareczka jak ze ôbrozka we ksiōnżce do dziecek: siwo, w keckach, z dudlikym a we brylach!
Ôd tych czasōw, co ich spōminōm minyło już kupa lot, a teroz zaś usłyszałach ôd jednej moji szkolnej kamratki, że ôna niy chce, coby ji wnuczek babcia godoł, bo je na to za modo! A jo ji padała tak: zrobisz jak chcesz, ale pamiyntej dziołcha, ze wiela na tym stracisz! I dała se przegodać.

Baner reklamowy

Komentarze

Dodaj komentarz