Jak Darek kocura dostoł

 

Po naszymu

 

Mōj synek Darek, co mu je teroz bez trzidziyści lot, ôd małego dycki przoł zwierzinie. Jedyn roz znod małego ptoszka, co wylecioł ze gniozdka, piyknie go pozbiyroł a prziniōs mamulce, coby go wylyczyła i tak my mieli we chałpie czorno jaskōłka, co ji "jeżyk" godajōm, ale ô tym to żech Wōm już pora lot nazod pisała.

A ze tym kotym to było tak: Ze robotami było ciynżko i jedyn chop, co mioł bar, wziōn Darka do ciynżkich robōt, na pōł etatu. Synek ni mioł tam źle, ale piniyndzy mioł porzad mało i kaj mōg tam przirobioł, bo se chcioł kupić kōmputer. Jedyn roz swoził drzewo do polynio ze takim jednym znajōmym. Brali już ôstanio prziczepa i mieli jechać do dōm, a tu ich woło feszter i pado: Patrzcie chopy, co jo chycił ! Ze rzyczki, co płynyła wele drogi ,wyciōngnōł modry miyszek a w nim było piyńć małych kocikōw! Nejści jakiś gizd chcioł tych boroczkōw utopić, ale Pōnbōczek niy doł!

Nasz Darek wsadził ich za jakla, chocioż cołkiym mokre były. Zagrzoły sie trocha a zaczły szturmować. Feszter se wziōn dwa czorno-biołe , tyn znajomy tyż dwa, taki mryngate, a ôstoł taki jedyn mały ryszawy boroczek. Chopy padali Darkowi, że to je koczka, a niy bydzie mu sikać po chałpie jak kocur, bezto synek wziōn tego gizdoka do dōm. Pōmianowoł go Zuza po swoji nojlepszyj kamratce jeszcze ze podstawowej szkoły. Zuza piyknie rosła, yno ôroz zaczła ôgon dźwigać jak kocurek, Synkowi to sie zdało dziwne i poszoł sniōm do weterynorza, a ôn mu padoł, że to je stoprocyntowy karlus, a coby go dalij we pomiyszkaniu dało sie trzimać, trza go bydzie wykastrować.

Nasz synek ciyrpioł przi tym barzi jak jego kocur, tak mu było go żol! Teroz Darek mioł jeszcze jedna staroś: niy wiedzioł, jak mo pōmianować swojigo pupilka, bo przeca na chopa Zuza wołać niy idzie, a nic mōndrego wymyśleć niy poradził! Jo wtynczos dostała robota we sōndzie i siedziałach ze takōm jednōm Basiōm, co tyż tam na "staż" ze Urzyndu Pracy prziszła. To była ôgromnie wesoło dziołcha i jak jo ji pedziała ô Darkowym kocie, to ôna sie ôśmioła, a padała, coby ôn pōmianowoł go Zeus!

Darkowi sie to widziało i terozki mo Zeusa, co za pora dni bydzie mioł 10 urodziny. Synek je ôgrōmnie za swoim pupilkiym, ale kocur za nim tyż.

GRYMLINO

1

Komentarze

  • Ziguś Podobo 21 lutego 2017 08:25Mie sie festylnie podobo wasze bajani Grymlino :)

Dodaj komentarz