Kożdy s nos ich isto pamiynto, bo to niy było tak downo, jak my wielgōm kupōm po mieście lotali. Tela ludzi to niy było ani we niydziela we kościele na sumie, bo tam szli yno ci, co chcieli, a na pochōd wszyjscy musieli! Jo te łażyni zaczłach doś wczas, boch jeszcze do szkoły niy chodziła. Moja potka brała mie ze sobōm, bo jak miała bajtla, to ze sztōrmōwkōm iś niy musiała. Rano we robocie dowali wszyjskim kōnsek wōsztu a żymła, coby ludzie mieli doś siły te fany a transparynty niyś!
Taki wōszt na lufcie lepij mi dycki smakowoł jako w dōma, ale te łażyni po mieście mi sie mynij widziało, beztoch narobiyła dycki butlu i ciotka szła sy mnōm do dōm pryndzyj niż pochōd prziszoł ku trybunie. Na tyj spōłce, to ôbie my skorzistały! We podstawowej szkole to my musieli na pochōd prziś ôbowiōnzkowo, ale jak sie dało, to my po drōdze kaj "zglajzowali", a żodyn nōm nic niy godoł, ale we licyum to trza już było sztōrmōwki nosić, a potym ś nimi prziś nazod, ale nikerym sie niy chciało.
Tyn chop, co nōm ich wydowoł, to se dycki zapisoł miano i wōl niy wōl, trza było deptać taki kyns nazod, ale modzi dycki cosikej wymyślōm, bezto że do szkoły mieli po drōdze ci, co szli na cug, to ôni brali te fany, za "małōm ôpłatōm", yny jedyn synek, co niy poradził ôdkozać frechownym dziołszyskōm, dycki deptoł ze wielgōm paczkōm sztōrmōwkōw za darmo!
To, co sam teroz chca napisać, wydarziło sie we 70. latach. Wtynczos postawiyli trybuna 1-majowo na nowym ôsiedlu i bez cołki miasto cis pochōd ze fanami, sztōrmōwkami, ze fotografijami ōd "Ludzi dobrej roboty" na patykach, a tak wiyncyj we pojstrzodku pochodu ludzie niyśli ôbrozki ze "świyntymi kōmunistami" – jako to sie dycki pośmiywoł po cichu nasz sōmsiod. Isto wymiyniać niy musza, kerzi tam byli? Jedyn ś nich wyglōndoł na takigo dobrotliwego starzika.
Wele pochodu po chodniku szła modo mamulka, ze bajtlym tak ze 3-4 lata starym. Jak maluśki ujrzoł tego chopa na patyku zaroz zaczōn wołać: Mama, Bozia, Bozia! Ta mamulka fest sie wylynkała, a mu padała: Cicho synku, to je Marks! Jeszcze niy skōńczyła, a już wele ni pokozoł sie taki jedyn chop, co go sam żodyn niy znoł, a padoł: Ładnie pani dziecko nauczyła! Sami widzicie, mało brakło, a była by jeszcze skuli bajtla ōstuda!
GRYMLINO
Komentarze