O wygodzkich kaczmorzach / Grymlino
O wygodzkich kaczmorzach / Grymlino

Wygoda, to je dzisio czyńś Mikołowa, ale kejś to była wieś, co do rybnickigo powiatu noleżała. Jak niy wiycie kaj to je, to Wōm podpowiym: na drodze ze Mikołowa ku Glywicōm, isto tam treficie! Kaczmy już tam kupa lot ni ma, bo po II wojnie jōm rozebrali, ale ludzie jeszcze porzad ô ni bojajōm. Wygoda to znaczy kaczma ze izbami do spanio i masztalami do przibytnych koni. Dzisio by my na to padali „hotel”.
Chocioż żodyn za rynka drugigo niy chyciył, to wszyscy godali, że tam sie tracōm bogaci ludzie. We wieczōr bogaty chop przijechoł, ôstoł we kaczmie na noc, a rano już ze kaczmy niy wyloz. Kaczmorz abo jego baba godali, co tyn istny wczas rano pojechoł dali, ale to niy była prowda, bo ôd niygo kōń stoł we masztali, a potym kōń sie tyż straciył, ale kery go zebroł, niy szło pedzieć, bo tam sie wiela ludzi ôbracało. Mama ôd mojigo chopa godała, co starzik godali, że kaczmorze mieli piyrszy we ôkolicy zygor ze wogami. Stoł we nojwynkszyj izbie kaj dycki kupa ludzi siedziało, popijało a jadło. Jak kery wandrowiec chcioł, coby go wczas ôbudzić, to kaczmorz mu ôbiecoł, co go bydzie wołać, jak tako godzina wybije, a potym zygor przestawioł i posyłoł chopa we droga we pojstrzodku noce, a tam kōnsek za wsiōm już czakali na niego zbōjniki, że Chudowa. Tak ze dwiesta lot nazod grasowoł tam tyż jedyn zbōj, co chodnikami pod ziymiōm szoł ze Bytomio aż do Halymby, ludzi napadoł, majōntek a towor im zebroł, a co ś nimi zrobiył, to żodyn niy wiy do dzisio, bo ani jedyn tyn napadniynty niy prziszoł nazod. Inksi zaś ludzie godali, co we kuchyni we kaczmie kożdo noc straszyło. Po piecu skokały garce połne miynsa, co sie tak nawarziło, aże ze garcōw wyłaziyło aże pokrywki dźwigało, a tak to sie bezmała yno jedne miynso nawarzi, a jaki – to se sami pomyśleć możecie! Isto tam te duszyczki ôd tych pōmordowanych straszyły. Musiało coś tam rychtik być, bo jednego kaczmorza ze Wygody zawrzili do heresztu, ale tam isto keryś kamrat mu pōmōg, bo ôn ze takigo ciynżkigo heresztu we Raciborzu uciyk, a zaroz sie kajś straciył, bezto prusko policyjo go niy poradziyła znojś! A bez drugo wojna bōmba na kaczma spadła i wszyjstek sie skōńczyło!

Baner reklamowy

Komentarze

Dodaj komentarz