Nowy Rok  nowe plany / Grymlino
Nowy Rok nowe plany / Grymlino

Nō i strzelilach, jak to godajōm: jak afa na fotografa! Zaczłach ze grubyj ruły: żodne tam, jako bydziesz wyglōndać za dwaścia lot, abo na wiela lot wyglōndosz teroz? Jo sie chciała dowiedzieć, co mnie potko we latach 2017 do 2020, i żech sie dowiedziała!
Jako słyszycie, roztōmili, dostałach teroz super plan na prziszły żywot na cołki sztyry lata. Tyn rok miała bych schudnōnć 6 kilo i jo już to leko przeskoczyła, bo na wodze straciłach aże siedym kilo! A na bezrok miała bych se kupić auto Ferrari, tyż nic ciynżkigo, jak dajōm go za darmo, abo za dziynkuja. Musieli by jeszcze prziciepnōnć szofera, bo jo niy poradza autym jeździć. Jednako jo je wybiyrno, bezto musioł by tyn chop być mody a gryfny, a jeszcze mie godać: Madame! A jak mi to niy klapnie, to se pożycza miniaturka „Ferrari” ôd swojigo wnuczka, bezto te zadani je cołkym leki dospełniynio.  Eli za sztyry lata ôstana miliōnerkōm, tego jeszcze niy wiym, ale cuda sie zdorzajōm, chociaż ludzie w nich niy wierzōm… Za to we 2019 zaplanowali mi malika. Niy pisza, że je to cołkiym niyrealne, bo medycyna do przōdku  fest poszła, ale ciynżko bydzie we moich latach mamulkōm ôstać, bo mie przeca już 65 bydzie! Skuli tego musza sie troszka zastanowić, eli sie za realizacyjo tego planu richtik zabiera? Jak to  jedna  moja kamratka usłyszała, to sie zaroz fest rozciepała a padała, że mo taki kwizy we „głymbokim poważaniu”! Jednako jo ji pedziała, że to sōm yno taki szpasy. Myśla, że Wy tyż żeście sie isto pośmioli ze tego, coch sam napisała?
Niy wiym jaki plany na tyn nowy rok 2018  mocie Wy, roztōmili czytelnicy, ale ze cołkigo serca życza Wōm, coby sie same, a bez wielgi proce spełniyły. A jak sie niy do inakszy, to bydziecie im musieli troszka dopomōc. Wszyjskigo Nojlepszego w Nowym Roku 2018!

Baner reklamowy

Komentarze

Dodaj komentarz