Tłsty Szczwortek a Popielcowo Strzoda
Tłsty Szczwortek a Popielcowo Strzoda

Nojprzōd dycki mōmy Tłōsty Szczwortek. To je taki dziyń, coby sie ludzie mieli najeś na forant, bo potym za tydzień zacznie sie Wielgi Post, a na stole dziynnie bydzie żur, żurek a żureczek abo ziymioki bez ômasty, mlyko krzczōne, prażōnki ze szrōty, a kawa gorsko bez mlyka. Ô chlebie ze masłym abo ze szpyrkōm mogecie zapōmnieć na cołki post! Bo bydzie yno suchy ze solōm, a jeszcze jak go bydzie pod dostatkym, to bydzie dobrze. Cosikej marne sōm te postne widoki! Bezto sie na tym Tłōsty Szczwortek tłōsto warziło a masne rzeczy piykło. Jo tam dobry krepel, we chałpie upieczony zjym, ale dwajiścia zjeś, to bych niy poradziyła. A sōm jednako tacy, co to poradzōm! Jo już za bajtla była wybiyrno, bo roz żech padała moji starce, że zamiast tego krepla ze marmeladōm, to jo by chciała tortensztik! Starka mi padała, że jo je fest maszketno, a krepel mi wziyna, a skowała do byfyja. Jo żech sie rozbeczała, a uhulkol mie dziepiyro mōj tatulek, co mi padoł tak: – Dziołszko, to je tako nasza, ślōnsko tradycyjo, te kreple sie piyklo i 500 lot nazod, a to je ôgrōmnie downo! Sōm taki dziecka, co dzisio na tyn krepel ni majōm, a suchy chlyb jedzōm miast świyntować, bezto miałabyś starce podziynkować, że ci tego krepla upiykła! Starka sie ani dłōgo na mie niy gorszyła a dała mi krepel nazod. A jak mi wtynczos smakowoł, mmm!
Ôd tego szczwortku niy minie ani tydziyń a już mōmy post, co mu godajōm Wielgi, bo two aże szterdziyści dni. Rano we Popielcowo Strzoda idymy do kościoła gōwy popiołym posuć, a żałować za grzychy. Teroz, to te posty sōm cołkym leki, ale kejś tak niy bōło. Jeszcze ze szkoły isto pamiyntocie, takigo polskigo krōla, co mu Bolesław Chrobry godali, tyn to mioł metody, na tych, co pościć niy chcieli! Tym wszyjskim, co posty ômijali, kozoł zymby powybijać. Bo jak kery zymbōw ni mo, to miynsa niy pożuchlo! Myśla jednako, że jeszcze keryś tym zōmb takimu borokowi ôstawili, bo inakszy by sie do wojowanio niy nadowoł. Na wojnie czasym bōło trza cosikej przegryź, abo zymbami przitrzimać, jak trzeci rynki brakło!

4
Baner reklamowy

Komentarze

  • senior Co wieś, to inaczyj. A może co rodzina, to inaczyj? 13 marca 2018 10:45U nas w doma była środa i czwortek.Jak do nas przyjeżdżała ciotka z Osin, to godała, że w szczoda pojedzie na torg. No ale u ni w zegrodzie nie rosły czereśnie ino cześnie. Co wieś, to inkszo godka.
  • Johan Do Gienek 10 marca 2018 23:26Nimosz racje to je po śląsku my tak też godali kedyś w doma pozdrowiom sam wszystkich.
  • Grymlino. do panoczka Genka 09 marca 2018 21:24Witom i dziynkuja za komyntorz. Skond żeście som panoczku Genek? Bo u nos na Ślonsku, co konsek inakszy godajom! Byda rada jak łodpiszecie, wtynczos to se mogymy na tyn tymat pogodać. Pozdrowiom
  • Gienek Wydziwianie 09 marca 2018 09:58Jaki "szczwortek", jaka "strzoda"? Po jakiemu to jest? Bo na pewno nie po śląsku!

Dodaj komentarz