Widzieli żeście cosikej takigo? / Dariusz Groborz
Widzieli żeście cosikej takigo? / Dariusz Groborz

Szesnoście lot było tyj dziołsze i już karlusy za niōm zaglōndały i możnej kery, ta historyjo ze tym kotym wymajstrowoł. Starka ze Margitkōm wylazły roz po śniodaniu na wyranda a tam na kōnszczyczku jakiś szmatki leżało cosikej taki małe, mryngate, kudłate a ôgrōmniście piszczało. Starka bryli niy miała, bezto niy poradziyła rozeznać, co to je. Margitka wziyna te stworzyni do rynki a uwidziala, że to je maluśki kocik, a pokozała go starce.
– Cosikej takigo! – dziwowała sie paniczka ze wille. – My mōmy yno kocura, a kocury przeca sie niy kocōm!
Margitka chciała, coby tyn kocik u nich ôstoł. I tak trefiył ôn do starczynej wille, a wszyjcy, co tam miyszkali mianowali go „Cosikejtakigo” i te miano sie do niego przilepiyło! Podwiela bōł maluśki niy bōło ś nim starości, ale potym, jako to dycki robiōm kocury, nauczōł sie smykać, bezto trza było dać na niego pozōr! Jedyn roz tyn rojber nawiydził badycimer, a skrōł sie pod wannōm . Wiedzioł, że jak sie tam fest pary narobi, to trza potym ōkno ôtworzić, a to mu w sōm roz pasowało! Wtynczos kōmpała sie Margitka, a dała pozōr, co kocur wyskoczōł bez ôkno. No, to ôna zaroz poleciała za nim! Jak była na siyni, ôbleciała jōm zima, to sie kapła, że je niy ôbleczōno! Jednako czasu niy bōło na taki rzeczy, bezto chyciyła ôbroz, co wisioł na ścianie a nim sie ze przōdku przikryła. Wyleciała na drōga, a pytała sie ludzi, co tam przechodziyli, eli widzieli „Cosikejtakigo”. Kożdy gupie machy strzyloł, ale prowda godoł, że niy widzioł! Dziepiyro jedyn starzik ji padoł:
– Idźcie do dōm dziołszko, boście sōm sago, gańba wōm potym bydzie!
Margitka pojrzała na sia i dała pozōr, że sie yno samōm rōmōm przikrywo, bo we nocy tyn zocny ôbroz, co w ni bōł, złodzieje wyciyni, a ukradli! Bezto już sie nic wiyncy niy pytała, yno strzelyła do dōm, a tam beczała do wieczora, po jedno ze gańby, a po drugi za tym gupim kocurym, co sie straciył! Było już dobrze po dwanostej, kej cosikej zadropało na dźwiyrze. To Cosikejtakigo sie znod! Minył miesiōnc, a Cosikejtakigo ôkociył sie we koszyku na wyrandzie, a jak myślicie, co padała starka jak znodła małe kociki? Mocie prawie: – Cosikej takigo!

6
Baner reklamowy

Komentarze

  • Grymlino. Do Wszyjskich Czytelnikow 26 marca 2018 21:51Słownik gwar śląskich( autorzy: B. i A. Podgórscy) uznowo za tak samo ważne słowa: cosi, cosik a cosikej, to teroz roztomili już wszyjstek wiycie i ni ma sie ło co bić!
  • cosik Grymlino, 26 marca 2018 18:24ni ma co sie starać jednym słowym. Jo nie żyja z godanio, ale tak se kombnuja, że może źleście to napisali. Jakby było: "widzieliście cosik kej takigo? -"widzieliście kiedyś coś takiego", to by mie po oczach tak nie bodło i zaros wiedziałabych o czym piszecie. Piszecie, bo szkryflać znaczy całkiyem coś inkszego.
  • Grymlino. Do cosik 24 marca 2018 19:42Dziynkuja Wom paniczko za łodpowiydź, byda sie musiała tyn zainteresować, a spytać sie ludzi, co sie tym zajmujom zawodowo. Nikedy taki malutki slowo narobi wielkich starości, bo kożdy godo jako pamiynto. Pozdrowiom serdecznie.
  • cosik Pani Grymlino, 23 marca 2018 20:16jeżech z Rybnika a moja godka się wyrobiła kaś między Kwalowicami a Jonkowicami i tak tam godały moje starki i wszyscy kierych znałach. Teraz mieszkom z drugigo końca miasta i dali sie godo, że może cosik by sie zmaszkieciło, cosik mie w szczewiku gniecie....
  • Grymlino do 23 marca 2018 12:25Witom, niy wiym eli som żeście chop abo baba, bezto niy wiym jako Was pomianować,wyboczcie. Za komyntorz dziynkuja, a co do godanio a pisanio, to jeszcze we naszyj ślonski godce żodnych pisanych zasadow ni ma, bezto kożdy godo a szkryflo jako chce i to je fajne! U nos w doma a u naszych somsiadow ze Żorow rodym godali dycki cosikej, drugo somsiadka, co boła ze Świyntochlowic zaś godała "cosi", a paniczka Rozała, co boła łod Gory św. Anny godała "co"(jo bych tak co zjadła), teroz modzi godajom "coś". Jako widać nasza godka sie zmiynio, a to znaczy, że porzad żyje. Taki je moji zdani, a Wy se możecie godać inakszy, ale rada bych sie dowiedziała skond żeście som. Pozdrowiom Wos serdecznie.
  • cosik Jakie cosikej?? 22 marca 2018 19:28U mie w doma godało sie i godo "cosik". Pani Grymlino, mie sie zdo, że coś fest cudaczycie z tym godaniem.

Dodaj komentarz