Jedyn roz, jak jo bōła Ewka nawiydzić, ôna zakludziła mie do izby, co ji jeji tatulek godoł gabinet, a ôtworziła tatulkowy szrank. Jak jo bych tak ôjcōm we łachach poszturała, to bych ôd nich po pazurach dostała, ale Ewka sie tatulka niy boła, bo jego liplink bōła! Na dole we tym szranku leżała jakoś paczka ôwiniōno brōnotnym papiōrym. Ewka tyn papiōr sjyna, a jo uwidziała piykny sztof na szaty. Taki same szaty miała jedna paniczka we gazecie, co jōm we dydyerach kupił Ewczyn tatulek. Dobrzech se to zapamiyntała, bo takich dziwokich a wrzasklawych farbōw we kupie na jednym sztofie jeszczech niy widziała! Ewka mi padała, że tyn sztof tatulek kupił do jeji mamulki, jak bōł na delegacyji za granicōm . Bōłach ôgromnie ciekawo, skond dziołcha ô tym wiydziała, ale ôna sie yno ôśmioła a padała, że podsłōchała, jak se mamulka ze starkōm pogadywały. Mamulka tyn sztof znodła przi sprzōntaniu, ale dała go tam nazod, coby niy psuć tatulkowi uciechy ze gyszynku.
Za dwa dni Ewka słyszała, jak starka i ciotka Milka (mamulczyna siostra) sie ugodały, że kupiōm mamulce ku tym szatōm piykne sandale ze wysokim krōnflekym a skōrzano taszka. Bezto Ewka ni mōgła być gorszo i zamiarowała uszporować troszka piniyndzy, a kupić mamulce piykno czerwiōno keta, coby do tych dziwokich farbōw na sztofie pasowała. Jednako to wszyjstek bōła tajymnica, bezto żech ni mogła tego żodnymu padać, ani moji mamulce! I dobrze sie stało, że tego krōm nas żodyn niy wiydzioł, bo we urodziny ôd Ewczynej mamulki zrobiła sie afera! Jeszcze przed śniodaniym tatulek prziszoł do kuchynie ze geszynkym do mamulki. Mioł ôbleczōno koszula ze tym dziwokim mustrym, a we rynkach, jako dycki, wielgi zagraniczny parfin! Tego to sie mamulka niy spodzioła, jak yno to uwidziała, to ji zaroz dech zaparło, a na ziym jak dłōgo prasła! Tatulek ciepnōł sie jōm retować, a przi tyj prziwiliji sie tyn zagraniczny parfin potrzaskoł. Potym bez cołki tydziyń Ewczyne pomiyszkani tak wōniało, że sie tam żyć niy dało!
Ps. Serdecznie dziynkuja panoczkowi Alojzowi Zimończykowi za pomoc we ślonski korekcie.
Komentarze