Dziyń Telewizyje

Nikedy myślalach se, że sie podziwōm yno na to, co mie interesuje, abo ôbejrza yno kōnsek, cobych wiedziała ô co we tym wszyjskim idzie, ale taki dziwani na telewizōr wciōngo jak narkotyk! I anich sie niy ôbejrzała jak pizło dwanoście, a moja robota stoła! Bezto teroz bez wiynkszoś dnia u nos telewizōr je zawarty. Czynsto dziwōm sie na „Teleexpres”, bo wartko czytajōm i za pora minut pedzōm te wiadomości, co na nich inksi potrzebujōm aże pōł godziny! Przaja tyż programowi ”Jeden z dziesięciu”, bo tam sie idzie wiela nauczyć. A raduja sie ze tyj nauki, bo to je przikłod, że wy mie dali siedzi tyn mały bajtel, co mu sie jeszcze porzad uczyć chce!

 

Nikedy tyż jaki film we wieczōr ôbejrza, ale ôstatnimi czasy we telewizōrze lecōm same powtōrki abo jakiś „mydlane ôpery”! Rada mōm tyż kōmedyje a muzyka i tego bych se życzyła na piōntkowe a sobotni wieczory. Isto drudzy majōm inaksze upodobani. Jedni radzi dziwajōm sie na wojynne a szpiōnarski filmy, co jo im niy przaja. Jeszcze inksi uznajōm yno szport. Jak grajōm „nasi”, to tyż siedza ze naszymi chopami, a społu ś nimi kibicuja, bo to sie inakszy niy godzi! Roz za czos ida tyż nawiydzić nasza sōmsiadka, paniczka Rōzalka. Ôna zaś nojwiyncy przaje tym zagranicznym serialōm, kaj to sie wadzōm, pierōm, potym zaś sie fest miłujōm, a za kwila zaś to samo! Dycki dziyń pryndzy musza ôbejrzeć chocioż jedyn kōnsek takigo serialu, coby my ô czym pogodać miały, bo ôna yno tym żyje! Mo tyż dwie kamratki, co ku ni przichodzōm. Ône tyż sōm we tym tymacie ôbznajōmiōne i dycki wre dyskusyjo! Jak jo im roz padała, że to sōm yno taki wydumane bojki, to sie na mie pogorszyły! A paniczka Neżka zawyrokowała, że jo tym ze telewizōra zowiszcza, bo bych takich bojek, co tela ludzi na świecie ôglōndo, napisać niy poradziyła! Jako widzicie roztōmili, kożdy mo swōj gust, a kożdy sie na tyn telewizōr dziwo. Bezto nōm sie zdo, że już dzisio bez niygo żyć sie niy do!

Komentarze

Dodaj komentarz