Jest jednak wielko różnica z geszynkami, tymi, co sie downij dowało, a tymi teraźniyjszymi. Niy godom już o takich geszynkach ekstra, że babeczka dostowo od kochającego chopeczka przewionzanego różowom szlajfką Mercedesa. Czasym jednak o urodzinach babeczki chop zapomino abo listonosz pomyli adres i tyn geszynk z tom szlajfkom londuje pod dźwiyrzami przijocielki.Jak mo chłopeczek urodziny, to babeczka tam dobrze wiy, czym mu radość zrobić, gorzij jest z chopami. Co sie to trza nakombinować, żeby zamiast uciechy z udanego gyszynku niy narobić jakij łostudy. Pamiyntom, co wystoł mój kolega od swojij baby, jak i kupiył na urodziny książka kucharsko. Przez poł roku śnim niy godała. Niy jedna by sie możno z takigo geszynku radowała, ale niy Truda, kero nojsmaczniyjsze babki i torty piykła. Niyjedna somsiadka do nij chodziła na porady, co i jak uwarzić abo upiyc na domowo gościna.– Co, chopeczku? Już ci sie zbrzidło moji warzynie? – spytała Truda z takom minom jakby jom kery w czułe miejsce nadepnył. – Niych ci teraz ta książka obiady warzi, bydziesz mioł kożdy dziyń jedna szkartka na talyrzu.Borok Achim przez miesiąc chodziył do mlycznego baru jodać, a potym jakiś czas do swojij mamulki, bo Truda mu tego wyboczyć niy poradziła. Wszystkim znajomym opowiadała, jak to Achimkowi uchlybiała i kożdy dziyń co inkszego mu warziła, a łon taki niywdziyncznik książka kucharsko i kupiył zamiast nowego cwitra, o kerym mu przed urodzinami zagadowała. Klipa niy chop, niych teraz loce do baru na obiady, to bydzie wiedzioł, kto lepij warzi.Jak bych mioł komu doradzić, co dać babeczce na urodziny, żeby łostudy niy narobić, tobych doradził buket kwiotkow i załoncznik, na kerym jest namalowany krol Zigmont Stary.
Komentarze