Jednako ludzie niy poradzōm żyć bez larma, a puszczajōm radyjo bez dziyń a we nocy, ni yno skuli tego, że muzyce a pieśniczkōm fest przajōm, ale coby sie sami we chałpie niy czuli! Bo jak taki radyjo nad łepōm nōm brni, to niy ma ważne ô czym, bele by tyn ludzki głos bōło słyszeć. Moja cioteczka Yma puszczała radyjo po cichu we kożdy wieczōr, troszka muzyki poslōchała, a potym sie zdrzimła i dycki te radyjo beblało aż do rana! Jedyn roz ciotka sie ôbudziyła we pojstrzōdku noce, ale skuli czego to niy poradziła spokopić. Cosik ji brakowało, ale coby to miało być? Jednako nic ji do gowy niy przichodziyło! Posiedziała kwilka na łōżku, a w kōńcu se padała, że pōdzie jeszcze do łaziynki, bo do rana je daleko. Chyciła za szalter, coby rozświycić światło, a tu yno szkyrtło, bo sztrōmu niy bōło! Teroz spokopiyła, że sie ôbudziyła, bo radyjo grać przestało! Tak sie tym znerwowała, że choć za godzina prōnd prziszoł nazod, to cioteczka do rana już usnōnć niy poradziyła!
Jak sie kaj potkōmy ze ludziami, co my ich downo niy widzieli to godōmy jedyn bez drugigo! Po jedno ze tyj uciechy, że my sie noreście potkali, a po drugi, że kożdy chce swoji pedzieć, a ô słōchaniu tych drugich ni ma ani godki! Potym jak przidymy do dōm, to niy pamiyntōmy, eli to Zuzka abo Marta bōła we Rzimie? Abo kero dziołcha godała cosik ô sklerozie? A to kery jōm mo, mōgymy już yno zgadować! A za pora dni sie ôkoże, jako po naszym klasowym spotkaniu, że ô Rzimie godoł kamrat Pieter, co sie tam dziepiyro wybiyro, a pytoł sie kamratki Maryjki, co je meteorologym, ô pogodowo prognoza, a nasze dziołchy jakimsi cudym usłyszały yny jedne słowo: skleroza!
Jak żech bōła mało toch tyż czasym wolała se pogodać ze kamratkami niż słōchać, co dō mie inksi godajōm, a potym żech niy wiydziała, co mi mamulka, abo nasza paniczka we szkole rozkozała. Ale hnet żech na to prziszła, że słōchać tyż je dobrze, bo jak cicho siedzisz, a słōchosz, to sie ô wiela wiyncy dowiysz bez pytanio. Bezto teroz tela tych starych ôpowieści, coch za bajtla wysłōchała, moga Wōm przipōmnieć!
Komentarze