post image

Kejś szło dziwoko świnia potkać yno we lesie, a to jeszcze niy we kożdym. Potym zaczły wyłazić na pola, a szkoda gospodorzōm robić. A teroz idzie ich potkać we wieczōr we mieście a na ôsiedlach, jak las je kaj po blisku. Ta nasza cywilizacyjo, niy yno ludzi wyszkolyła, bo ta dziwoko zwierzina tyż sie wiela nauczyła! Nojprzōd tego, że jak kaj sōm wiynksze kupy ludzi, to tyż tam je do zwiyrzōw jodło. Styknie tam iś, hasiok przewrōcić , a gościna gotowo! Potym zwiyrza prziszły na to, że autōw, chociaż wyrczōm boć sie niy trza, bo styknie im yno pod pyski (czytej koła) niy włazić. Jak przidziesz ku ludziōm we wieczōr abo we nocy, żodyn cie niy pogoni, bo ludziska wczas idōm leżeć a spać!
Z drugi strōny ze tōm naszōm przirodōm ni ma jeszcze tak źle! Jak żech łōńskigo roku bōła we szpitalu we wodzisławskich Wilchwach, to my, pacyjynty na zajōnce a sorniki sie bez ôkna ze salōw dziwali. Pora lot nazod byłach we szpitalu we katowicki Ligocie. Tam po parku pod wieczōr te dziwoki świnie ze modymi lotały. Ône były tak bez matka wyszkolōne, ze ôna piyrszo bez alejka przeleciała na drugo strōna, a potym puszczała te swoji pasiate maliki po jednym. We nikerych miejscach ludzie sami tym dziwokim stworōm jodło ciepali, bezto jak teroz jakiś czowiek przidzie do lasa, abo parku, to ône myślōm, że isto cosik dō nich dobrego mo! To praje skuli tego sie słyszy, że kajś dziwoki świnie ludzi pogōniyly.
Kōnsek ôd nos, tam kaj miyszkajōm moji przociele, to jedna dziwoko świnia prziszła rzykać do Pōnbōczka. Do lasa tam ni ma daleko, bezto już przōdzi ludzie widowali dziwoki świnie na kościelnym placu, ale ta bōła tak frechowno, że rajn sie wryła! Niy przeszkodzało ji ani dwoje dźwiyrzi! Bez mszo szła se pojstrzodkym kościoła, potym ôbleciała farorza a wlazła za ołtōrz. Tam kwilka poszturała, a zaroz potym wleciała do bocznej kapliczki, a niy chciała sie ruszyć, chocioż jōm dwa kościelne wygōniali. Jednako w kōńcu wylazła do tych swoich pobratymcōw, co stoli na kościelnym placu. Jak sie mszo skōńczyła, to już tych niyproszōnych gości przed kościołym niy bōło!
Sami widzicie Roztomili, że tyn nasz świat fest sie zmiynio. Jeszcze trocha, a możnej zwiyrzina sie godać nauczy! Wtynczos by my sie jasności dowiydzieli!

Komentarze

Dodaj komentarz