post image

To bōła tako zocno rzecz w sōm roz do niygo! Taki szrank je ogromnie ciynżki, bezto chop musioł najōnć fyrma coby mu go prziwiozła. Kej już mioł swōj wymarzōny szrank na miyjscu, ôkozało sie, że we jego willi dźwiyrze sōm za wōnski! Dźwiyrze poszyrzić, a nōwe wstawić, to keryś dziyń potwie, a sam ludzie stojōm a czakajōm! Bezto padoł se, że szrank trza postawić we starym pomiyszkaniu, co bōło we grubskim familoku! Padoł tym chopōm, co te zocne noczyni prziwioźli, że im dopłaci cosikej ekstra, za wyniysiyni tego szranku na tyn sztworty sztok, kaj przōdzi miyszkoł. Niy trza im bōło dwa razy godać, coby chycili szrank we styrech i „wio” ś nim na schody, a tu sie zaczło! Roz trza sie bōło ôbracać, roz przekipnōnć szrank bez gelynder, co go niy szło rozkryncić i tak zanim sie dostali na drugi sztok, mieli już doś i ani ich te ôbiecane ekstra piniōndze niy poradziły uradować, ale kludziyli sie dali! Na trzecim sztoku potkali jednego chopa, co mioł już troszka „pod czopkōm”. A ôn im padoł tak: Wy klipy, wyście sie źle za to wziyni, cołki magnez żeście już wypociyli, to teroz siły niy mocie! Wszyjscy gruchli śmiychym, a szrank puściyli! Ôn sōm sjechoł po schodach na drugi sztok, a sie fest potrzaskoł! Chopy, co go niośli, niy dostali ani grosza za robota, a resztōwki tego antyku trefiyły do szopki na placu. A tyn mōj znajōmek dłōgo niy poradziył przeżałować, że tela piniyndy stracioł! Ale we kōńcu znod jednego takigo bezrobotnego, co mu tym szrank poslepioł, a troszka ôdpicowoł, a jakoś to grało! Jednako tyn znajōmek już go niy chcioł. Bezto doł ôgłoszyni, a hnet chyciył kupca, co mu uwierził we bojka ô tym, jako to starka noczyni ôd swoji potki, co hrabinōm bōła, bez cołko drugo wojna we pywnicy przechowała, ale we szterdziestym piōntym we starczyno chałpa dmuchła bōmba i yno tyn szrank, chociaż fest poōbijany ś niego ôstoł!
– Jako żeście sōmsiedzie na tym interesie wyszli? – spytałach sie ze ciekawości.
– Wiysz dziołcha, jeszczech na nim piyndziesiōnt złotych zarobioł! – ôdpedzioł.

Komentarze

Dodaj Komentarz

Twoj adres e-mail nie będzie opublikowany.