post image
Pixabay Zaroz wszyjscy zaczli sie przekwolać w znajomości ptoków

Bo za kwilka były sam wróble, co im tyż cilipy, abo dziamble godajōm, a jeszcze jakiś inksze małe ptoszki. Zaroz wszyjscy zaczli my sie przekwolać, kere znōmy. Po polsku jo pōmianowała doś pora, ale po naszymu, to ze tym już bōło gorzi! Zaczli my ȏd tych wiynkszych: że bocian to je po naszymu boczōń, to wiedzieli wszyjcy.  Potym nasza ciotka Ina, co mo już bez ȏziymdziesiōnt  lot spōmniała se, że na sowa godali kejś ojla ( to isto je ze niymieckigo). Ujek Bolek padoł cosik ȏ fanzanie, co bez pora zimōw siedzioł u nos na placu pod krzokym, ale nasze dziecka sie niy kapli, że godo ȏ tym bażancie, co dycki bezdōmnym kotōm „kulki” ( karma) wydziubowoł.

Potym pōmianowali  my jeszcze szkowrōnka a czajka co sie po polsku praje jako po naszymu mianujōm. Jak padałach, że jo już sam pora dobrych lot nachtigala niy słyszała, to nasza wnuczka niy strzimała, a padała: Ȏma godej po ludzku! Za to mōj chop doł ji zaroz „pytani za10 złotych”! Podpowiydź bōła tako, że tym ptok piyknie śpiywo we wieczōr abo kole 3 godziny we nocy i  ta mało „małpica”, te 10 złotych wygrała, bo zaroz sie kapła, że godōmy ō słowiku. Ciotka Maryj, co miyszkała przed drugōm wojnōm we Katowicach dycki spōminała godki ȏd swojigo sōmsiada - Niymca.

Tyn chop godoł tak: polski - dziwny jynzyk, bo sōmsiod Szloik (nazwisko Słowik), fōgel szloik (słowik) i krauze szloik!  Jak sie wele nos na gałynzi pokozała ziymba, to mōj chop zaroz pedzioł, że po naszymu to je pinkawa. We takich hurmach czynsto lotajōm tyż taki małe czorne ptoki, co mōj potek godoł, że to je cilip, co wlecioł do kōmina! Jak tyn ptoszek mianuje sie po naszymu tego niy wiym, ale po polsku godajōm mu kopciuszek! A możnej kery s Wos wiy jak mu je po ślōnsku? Za kwilka przileciała cołko hormijo srokōw a kawkōw i te maluśki ptoszki przegnała i tak sie nōm skōńczyła fajno graczka!

Roztōmili, jak znocie jeszcze  jaki inksze ślōnski miana na ptokōw, to mi posłejcie informacyjo do redakcyje „Nowin”. Była bych ȏgrōmnie rada, jakbyście jeszcze co ȏ tym istnym ptoku napisali: kaj żyje, jak je wielgi, a jak wiycie, to napiszcie tyż jak mu je po polsku. Możnej ze Waszōm pōmocōm szło by zrobić taki ślōnski słownik naszych ptokōw?

Grymlino

Komentarze

Dodaj Komentarz