Do zōmku najechało sie dycki połno roztōmańtych gości. Paniczki ȏstały w dōma, bo ni miały rade tych kwawych graczkōw, co jejich chopy! Za to panoczki „we kōmplecie” wczas rano rano stawiyli sie we lesie. Tam farorz ze sōmsiedni parafije, co tyż rod na gōny łaziył, ȏdprawiył na niwie pod lasym mszo do świyntego Huberta, patrōna fesztrōw a myśliwcōw, a dziepro potym po ôdtrōmbiyniu gōnu wszyjski panoczki szli za mojim starzikym na miejsca do strzylanio, a drugi feszter poszoł we drugo strōna, bo mioł wiyś nagōnka. Przi takim gōnie fesztry musieli ȏgrōmnie dować pozōr, coby „świōnteczne myśliwce” ludzi ze nagōnki niy postrzylali! Nikedy to było tak, że jedyn abo drugi chopeczek niyrod zabijoł zwierzina i niy chcioł iść na gōn, ale musioł, bo go pytoł tam keryś ważny czowiek: pōn derechtōr ze firmy, nikedy jaki grof abo inkszy hrabia, a im niy szło ȏdkozać!
Inksi zaś sie boli, że ich na gōnie zastrzelōm (bo sie tyż nikedy taki rzeczy trefiały), bezto pora dni do przodku spisowali testamynty! Gōn to niy była yno graczka, ale tyż czasym utropa!
Mojimu starzikowi trefiył sie roz fest ważny panoczek, co chcioł se postrzylać, ale niy poradziył, yno że to wiydzieli wszyjscy krōm niygo. Panoczek mioł życzyni zastrzelić se jelynia, ale żodyn niy chcioł iś we nagōnce, bo tyn chopeczek proł ze swoji angelski fuzyje do wszyjskigo, co sie yno poruszało. Bezto mode fesztry dogodali sie ze mojim starzikiym a ȏdegrali tyjater. Niy wadziło im, że jejich drama miała yno jednego ȏglōndacza! Wykludziyli chopa na wielgo niwa, postawiyli ze mojim starzikym a sami straciyli sie po drugij strōnie, a zaczli prać kijami po krzach a tōmpać. Panoczek strzyloł, jak ȏszalały, ale na drugo strona bōło doś daleko, bezto jego kule tam niy niōsły. Jednako ȏn ȏ tym niy wiydzioł! Potym jedyn mody feszter kwiknōł jako ranny zwiyrz a zaczōn uciekać tam kaj we krzokach był skowany dziyń pryndzy zastrzelōny jelyń. Mieli szczyńści, że panoczkowi niy prziszło do gowy pomacać ônego, eli je jeszcze ciepły!
Jako widzicie, feszter to je taki fach, co w nim nic ni ma bez rezikowanio!
Grymlino
Komentarze