post image
Elżbieta Grymel Downi synki mieli swoja świynto Katarzina (25 listopada) a dziołchy świyntego Andrzyja (30 listopada)

Jedna starczyno kamratka, Zofija ji było na miano, dowiedziała sie, co trza zrobić, coby swojigo prziszłego, ślubnego ôbejrzeć, ale było se trza dować pozōr, bo sie mōg tyż dioboł pokozać!

Ta dziołcha skowała zdrzadło pod stołym już dziyń pryndzy a przikryła go swojōm chustkōm. Ale żodyn niy śmioł ȏ tym wiydzieć, bo inakszy by sie wrōżba niy społniyła! We „andrzyjkowy” wieczōr, jak już wszyjscy poszli spać, frelka siadła za stōł, a czekała aż na kościele piźnie dwanoście! Potym zapolyła dwie świyczki, przeżegnala sie a wyciōngła zdrzadło. Dziwała sie do niygo już dobro kwila, ale nic niy widziała, ȏroz wrzaskła a padła zymdlōno na ziym. Jak prziszła do sia, padała wszyjstek starce, a ȏna ji kozała iś zaroz na drugi dziyń na spowiydź. Farorz na dziołcha nawrzeszczoł za to, że czary robiyła, a kozoł ji iś na pōńć do Anabergu!

Tam po drōdze potkała swoji przeznaczyni – modego wojoka, co szeł praje na wojna. Chcioł po dziołsze adresa, a ji potym pisowoł. A jak prziszoł nazod, to już niy bōł taki gryfny jako przōdzi, yny gymba mioł tako straszno, jako tyn, co sie ji we zdrzadle pokozoł! Młodzi pożyniyli sie na Godni Świynta, a Zofija dycki godała, że ȏna wiy, jaki jeji chopeczek mo dobre serce, a to ji styknie za cołko krosa na świecie! Ale ze drugi strōny: co miała godać, jak ȏn bōł ji już downo ȏd Pōnbōczka przeznaczōny?
Inkszo starczyno kamratka ȏgrōmnie chciała sie wydać, bezto we kożdy „andrzyjkowy” wieczōr loła tyn wosk bez klucz do wody. Ze poczōntku ze tygo „ulywka” nic sie niy dało wyczytać, aże w kōńcu uloł sie ji taki dziod ze brodōm! Za żebroka wydać sie niy chciała, bezto fest na świyntego Andrzyja pōmstowała! Ale isto źle ta wrōżba ȏdczytała, bo niy prziszoł po nia żodyn żebrok, yno stary a bogaty aptykorz ze Rybnika!

Dzisio we „andrzyjki”, dziołchy a synki idōm społu do dyskotyki abo do kina ( jak corōnavirus niy szkłōdzi). Nikedy se jeszcze frelki w dōma ze wosku powrōżōm, ale to już ni ma tak, jako piyrwej.

Grymlino

Ps. Podziynkowani do panoczka Alojza Zimōńczyka za pōmōc we ślōnski korekcie.
 

Komentarze

Dodaj Komentarz