- Wiluś, słyszysz ? Jakoś masara kole nos furgo ! – łodzywo się nogle AnaWiluś łotwiyro jedyn ślyp i rzecze: - No słysza. I co z tego ?!- Ano to, że trza wziąć klapaczka i zrobić z niom porzondek – pado Ana.- Jak cie tak ta masara szteruje, to sama weź klapaczka i zabij jom-odpedzioł Wiluś i głośno ziywnoł.- No ty diosecki zgniylochu !!! Toż jo już łobiod nawarzyła, szkorupy pomyłach i ty mi kożesz jeszcze za muchom tyrać ?!! – rykła na cołki karpyntel Ana, a Wiluś aże podskoczoł na szislongu i łotwar łoba ślypia: - Mie dzisioj jakoś ta prawo szłapa boli i głowa tyż, to dej mi babo chocioż na godzina pokój.W tym momyncie mucha siadła na Wilusiow kichol i zaczła po nim szpacyrować. Wiluż łodganioł jom rękom, ale łona przesiadła się na jego gynik.- Dyć to chopie niy być taki zgniyły i dźwignij zadek, bo te twoje fechtowanie rękami niy mo żodnego cweku – pedziała Ana i wygodnij roztopyrczyła się na szislongu.- Przestoń mie szterować. Sama mosz rzić jak kachlok i ciężko ci je go ruszyć z miyjsca – fuknoł w strona Any, ale stanoł, żeby poszukać klapaczki. Znojd jom w kącie za bifyjym i wzion do ręki. Zaczon się rozglondać po izbie za masarom. Łoroz zejrzoł, jak siadła na lewe Anczyne ucho.- Już mom ta diosecko marcha – zawołoł i chlastnoł klapaczkom w głowa łod Any. Udało się. Niyżywo mucho spadła na dyliny.- Ałaaaaaaaaa - rykła Ana i chyciyła się za łobolałe ucho. Wiedziała, że Wiluś zrobioł to naskwol za to, że niy dała mu pokój podrzymać po łobiedzie. Łobiecała se jednak po cichu, że nastympnym razym to łona dorwie klapaczka i zrobi takie polowanie na muchy, że Wiluś je dugo popamiynto.
Komentarze