Grzegorz Buchalik
Nojprzōd spowiydź. W 2021 na szpilach powyżyj poziōmu rybnickij klasy B byłech 0 razy, szpil ekstraklasy ôd poczōntku do kōńca widziołech 1 roz. Niy żałuja. Ofyn prziznōm ni ma żech wiernym fanym tych rozgrywek (przinajmij niy aż takim coby sie umartwiać regularnym dziwaniym sie na cołki szpile). Nikedy, ale nawet i tego niywiernego, zmierzłego kibica coś poruszy. Poniżyj trzi fusbalowe wydarzynia roku na Ślōnsku, skuli kerych werci sie tym szportym interesować.
1. Podolski kludzi sie do Zobrzo.
Zrobiōł jak ôbiecoł. Noreszcie. Po drōdze zaliczōł jeszcze liga turecko i japōńsko coby w kōńcu ôstać piyrszym w historii Majstrym Świata w klubie Ekstraklasy. 36-letni Łukasz Podolski podpisoł kōntrakt z Górnikiym Zobrze, kerymu kibicowoł za bajtla. Na poczōntek pokludziōł tryning z dzieckami, krynciōł filmiki. Zaangażowoł sie fest marketingowo, z tym że niy yno w Górniku... W przerwach miyndzy tryningami Łukasz robiōł za jurora w nimieckim Das Supertalent. Przed sezōnym poszła nawet fama, że terminarz Ekstraklasy mo być dosztelowany pod nagrania telewizyjnego show RTL-u. Tymat do wylachanio i “zmemowanio”, pra? Po telkich newsach i piyrszych szpilach w Górniku szłoby sie spytać pod wiela poważnie Łukasz traktuje te grani w Zobrzu, ale ni ma co sie starać. Łukasz chyciōł forma i zaczōn szczylać bramy, a wiedzioł kedy zaczōnć...
2. Górnik vs Legia 3:2
Ja, to tyn szpil, w kerym przełōmoł sie Podolski. To tyż tyn spōmniany, jedyny szpil Ekstraklasy, kery ôbejrzołech do kōńca. Werciło sie doczkać 96. minuty i zwyciynskij kepki Kubicy. Wnioski: JEDYN. Fajnie (Górnik do przodku). DWA. Rychtyg fajnie (Legia pomału na spadku). TRZI. Forgot szło sie na to dziwać. Szok! że w Ekstraklasie może być taki tympo gry (przinajmij w piyrszej połowie). SZTYRY. Niy żebych bōł złośliwy, ale dołech pozōr, że moja chynć śledzynio Ekstraklasy rośnie proporcjōnalnie do ilości porażek Legii. PIYNĆ*-wniosek poboczny. Sztyjc niy rozumia idyji ciepanio rolek papiōru haźlowego na murawa, ale mono to zy mnōm coś niy tak...
3. Piszczek nazod w dōma.
Nastympno sympatyczno wiadōmość. Jedyny transfer, kery po moimu przebiōł Podolskigo to przynści Łukasza Piszczka z Borussi Dortmund do LKSu Goczałkowice. Jeszcze w sezōnie 2014/15 piyrszy klub Łukasza groł w tyskij klasie A. W tym ôkresie Piszczek zaglōndoł na szpile LKSu na zgrupowaniach reprezyntacji Polski. Pōmogoł swojim z doskoku. Terozki w Goczałkowicach majōm już III liga, Piszczka w piyrszym składzie a do tego działo Akadymio Borussii Dortmund. Szłoby sie tam karnōnć. Coś dō mie. Trocha światowego fusbalu by sie lizło, a ryzyko trefiynio kiboli bliski zerowymu. Chyba, że jacy hooligansi z sanatorium citnōm...
Na razie, ale wracōm do B Klasy. Przi ôkazji news lokalny. Moja Iskra Rowiyń zawiōnzała latoś spōłpraca z Akadymiōm Fusbalowōm Górnika Zobrze. Mono doczkōmy sie hneda jakigo rowiyńskigo Poldigo? We 2022 dużo fusbalu wszyskim!
Komentarze