post image
Elżbieta Grymel

Chopa se tyż wziyna ze wsi, ale ȏn już delszy czos we mieście we hucie robioł. Biydnie se żyli, ale swoji zwyki se zachowywali. U nich w dōma zrobić palma, to bōła nojważniyjszo rzecz krōm wielgonocnej spowiedzi! Starka już keryś tydziyń trzimała prōntki ze trześnie we zbōnku ze wodōm, coby gryfnie zakwitły, a jeji dziecka ji dycki natargali kokocza, kociankōw, wikliny a kućkōw ze trzciny, co rosła na Hulokach. Ze tego wszyjskigo we sobota przed

Niedzielōm Palmowōm kryńciyło sie palma! Starka musiała te wszyjski prōntki fest swiōnzać, coby sie czasym palma niy rozleciała, bo jeji synki: Francik a Jozefek niōm pod kościōłym dziołchy po puklach prali. Starczyne synki mieli  kamrata Hańriszka, co tyż rod dziołchy po zadku palmōm trzaskoł abo wyczynioł inksze mecyje. Ȏd swoji  mamulki mioł ȏn fest przikozane, co by niy łykoł kociankōw ze palmy, bo jednygo roku bōłby sie udowioł, jakby niy nasza starka, co go zratowała. Wsadziyła mu palce do gymby a ta zaklinowano kocianka ze karku wytargała, a tyn gizd ji za to jeszcze napyskowoł!

Padoł, że po piyrsze to ȏn yno udowoł, ale rynkami proł luft, jakby rychtik go co dusiyło! A po drugi spytoł sie naszyj starki, eli se rynce umyła, bo przeca mu we gymbie jako dochtor macała! Takij frechownej godki to jeszcze  starka niy słyszała a ȏstała stoć jak słup soli! Ale wszyjstek słyszała jego mamulka, a swojimu syneczkowi za to porzōndnie ȏzwyrtała! Jo te wszyjski historyje znōm yno ze ȏpowieści ujkowych kamratōw. Jednako my ze bracikiym tyż czasym co naszej starce wystrugali, chociaż my ni mieli złych zamiarōw!

Ale taki małe łebonie to nojprzōd robiōm, a potym myślōm!  Byli my jeszcze ȏba za mali, coby samymu po bażołach lotać, a prōntki do dōm snosić, ale radzi my słuchali starczynego rozprowianio przi robocie. Ȏd ni my wiydzieli, że lyska a jałowiec chroniōm ȏd pierōna, a kery ich mo po blisku, tymu chałpa nigdy niy zgoreje. A to wszyjstek skuli tego, że Pōnboczek doł tym strōmōm wielgo moc za to, że  go ȏchroniyły przed wojokami ȏd Heroda.

Naszyj starki już downo ni ma, bez dwaścia lot to jo robiyła palma ze swojimi dzieckami, a tyn rok chca jom  zrobić ze swojimi wnukami, a możnej za piyndziesiōnt lot  to  ȏne pokożōm swojim wnukōm, jako sie robi nasza ślōnsko palma...

Grymlino

Na tydzień przed świętami, w weekend 8-10 kwietnia na raciborskim Rynku czekać będzie na Was ponad 40 wystawców z artykułami świątecznymi: stroikami, koszykami, ręcznie malowaną ceramiką i własnoręcznie wytwarzaną biżuterią. Na straganach znajdziecie też wyroby z włóczki, siana i sznurka. Warto przyjść także, aby spróbować na miejscu i zaopatrzyć się w domowe wędliny, sery podpuszczkowe i rzemieślnicze, langosze, ręcznie wyrabiane makarony, sosy, konfitury i syropy. Do kupienia będą także zakwasy na wielkanocne zupy, zakwas chlebowy oraz słodycze, m.in. chałwy. 

Komentarze

Dodaj Komentarz