We tamtych hańdowniyjszych czasach po ziymi łaziyły roztōmańte straszki: utopki, połednice, strzigi, mamuny, jaroszki, diobły a smoki, co ludziōm fest szkłōdziyli abo do grzychu ich prziwiyś chcieli a potym jejich dusze skludzić do piekła! Niy widziało sie to jednymu papiyżowi, co mu Sylwester bōło na miano i ȏn te wszyjski straszne stwory przeklōn a zawrziył we ciymnej piywnicy kajś we Watykanie. Dwa nojgorsze chachary, co tam siedzōm to sōm: smok Lewiatan a som Szatan. Ȏba sōm fest do watykański skały przikute i bezto przed kōńcym świata na wiyrch niy wylezōm!
Szatana papiyż Sylwester przikuł hrubym lańcuchym, co mo tyla ȏczek wiela je dni we roku, a padoł mu, że bydzie mog wylyź na wiyrch, jak do Wielganocy te ȏstatni, nojhrubsze kōłko zymbiskami przegryzie! Bezto tyn gizd sie staro jak może, a dni se na tym lańcuchu ȏdliczo. Już pora razy bōł tak daleko, że yno stykło jeszcze pora razy zymbiskami pobrusić, a bōłby na swobodzie, ale zrobiył to troszka za niyskoro. Bo jak na ziymi ludzie zaśpiywajōm „rezurekcyjo” , to tyn lańcuch sie slepio nazod, a Szatan musi brusić zymbiskami ȏd nowa. I tak to już two bez tysiōnc lot! Jak yno zwōny we Wielganoc wczas rano zabijōm, coby ȏgłosić Zmartwystani Pański abo ludzie zaśpiywajōm jako pieśniczka ȏ Zmartwystałym Pōnboczku, to sie zaroz cołki piekło zatrzyńsie a diobelski lańcuch nazod slepi!
Jak żech ȏ tym kejś bojała swojim dzieckōm, co wtynczos jeszcze mali byli, to ȏni hnet prziszli na to, że tyn Szatan musi być fest gupi, bo by stykło przegryź kere myjsze a ciynksze ȏczko, a na to samo by wyszło! Możnej, że nasze dziecka mieli prawie! Ale może tyż być we tym jaki hoczek, na przikład te maluśki lańcuchowe ringi sie przegryź niy dajōm, bo sōm fest twarde? Tego to żodyn niy wiy, bo dioboł jeszcze niy probowoł! Możnej ta bezkurcyjo ni ma tako gupio, jako se myślymy? Bo lepszy je zymby mieć i wylyź choćby za tysiōnc lot, niż se ich połōmać i na wieki we tym watykańskim lochu ōstać! My sam za tym gizdym niy płaczymy, bezto niych tam siedzi jak nojdłużyj!
Wom Wszyjskim życza Błogoslawionej Wielgi Noce!
Wasza Grymlino
Komentarze