Coś je niy rychtyk


W ogromnyj hali w cyntrum Vancouver, kiero się nazywo GM Place zmieści się kole 40 tysiyncy ludzi. I wiycie co ? Jak Kanaksy grajom, to sala je połno ! Yno co to je za impreza ! Przodzi trza zaparkować auto. Jak wszyndzi po blisku parkingi już som fol, trza się trocha nakryncić, zanim się co znojdzie. Potym raja do bramy, a dalij - już na terynie hali hokeja raja do hamburgera, frytek i ...piwa. Jak już się w tyn ekwipunek zaopatrzycie, możecie se szukać swojigo miyjsca w sektorze. Zice som dość wygodne, telebim wielki jak pieron. Jak kiery mo szczynści, to go tam pokożom na tym ekranie jak wrzeszczy abo inkszo gupio mina robi, abo frytki w keczupie moczy. Nagłośniyni je tyż ekstra, ale najfajniyjsze som komyndy, co kibice majom robić. I tak po dobryj akcji, pokazuje się napis „wrzeszczeć i klaskać”, po bramce gro muzyka i napis koże wołać „Kanaksy...” i tak dalij. Nojbardzij mie zaskoczyło, że wszyscy kibice tego słuchajom i robiom tak, jak je napisane. Co za posłoszny narod te Kanadyjczyki ! Musza prziznać, że światła, muzyka, no i przede wszystkim grocze, robiom pieronowe wrażyni i nastroj. Te gizdy jeżdżom choby żywe strzybło. Kryncom się, wyścigujom. Tympo je zawrotne. Skond oni majom tela siły ?Na przerwie trza załadować baterie...hamburgery, frytki i...piwo. No jeszcze przedtym trza zaliczyć raja do WC, co by te stare piwo oddać. I zaś się zaczyno. Muzyka, ekran i gra. Ludzie stowajom, siodajom, śpiywajom i wrzeszczom na komynda. W miyndzyczasie zajodajom i popijajom. Na samej gorze tyj hali som szpecjalne balkony, wykupione dlo ważnych i bogatych. Nikiedy zakłady pracy wykupujom i tam w nagroda wysyłajom swojich pracownikow. Na tych balkonach je zarozki bar, tak że niy muszom nikaj chodzić, co by się pokrzepić. Nikierzi z tego balkonu muszom być potym odkludzani przez swojich kamratów, ale to już je inkszo godka. Som hokej je grom gibkom i ciekawom.Ale jedno mie zastanowiyło ! Nojwiyncyj emocji ci grzeczni kibice przeżywali, kiedy na lodzie doszło do jakijś szarpaki. Wtedy dostowali szału - ci co się prali, ci co syndziowali i ci co siedzieli na widowni. Wyglondało to tak, jakby o to praje w tym hokeju się rozchodziyło, co by jedyn drugimu tym kijym nawalił po głowie, abo piynściami po pysku. Po krótkij szarpaninie ze syndziami okwawiyni „szportowcy” poszli za kara na pora minut do klotek. I tak aż do nastympnego razu.Terozki chca wrocić do sprawy o zabójstwo, o kieryj je fest głośno w USA. Tak po krótku, co by się niy rozwlykać. Na meczu hokejowym dzieci dwóch łojców powadziyły się skuli gry i jedyn łojciec pobioł drugigo ze skutkiym śmiertelnym. Tyn co zabił, boł przkładnym ojcym trzech synśw. We świecie hokejowym i szportowym zawrało. Jak to je możliwe, żeby cosik takigo mogło się stać ?! - pytały nojwiynksze stacje telewizyjne. Dyć szport mo wychowywać ! Dyć hokej mo uczyć gry w zespole ! Coś je niyrychtyk ! Beztoż od długszego czasu niy oglondom hokeja. Jak bych jo wzion jako laga i przechodnia na drodze prasnył w pukel abo po pysku naszczyloł, to mom sto procynt pewności, żeby mie zarozki policjo zawarła w hareszcie. A sam na oczach cołkigo świata te huncwoty się pierom do kwie. I to się podobo ?! Nojwyżyj jakoś sztrofa potym tyn winny zapłaci i juzaś je wszystko OK. ?!Niy ! To niy je OK., bo młodzi ludzie od tych swojich idoli się uczom. I jak widzom, co taki zachowani je tolerowane, toż potym to samo robiom. Chacharstwo, kiere toleruje sie dlo pijyndzy, obroco sie przeciwko społeczyństwu. Nadziejom som już godki, że czas to ukrocić i zmiynić regulaminy, co by hokej boł grom czysto szportowom, a niy zachyntom do bojek. No toż obejrzymy , czy to sie udo.
Baner reklamowy

Komentarze

Dodaj komentarz