- Niy, to jest taki świynto zakochanych. Posyło sie tyj dziołsze, keryj sie przaje, taki życzynia ze rostomajntymi serduszkami.- To napewno od tyj Walyntyny pochodzi, tyj ruski co w 63 roku lotała nałokoło ziymie.- Ale kaj tam, to amerykony piyrsze zaczli świyntować sztyrnostego lutego, we św. Walyntego.- Co tyż to ci ludzie niy wynochwiom. Jak my byli młodzi, to sie blank ajnfach szło do tyj istnyj, keryj sie przoło i zolyciyło sie. Na muzyce, abo kaj na jakijś pońci, wpadła ci dziołcha do oka i już dalij to samo szło. Co wy teraz mocie z tych internetowych zolytow ? Ani kusku niy dostaniesz od tyj twojij Asie bez tyn kompurtek. Tak ani byś bombon lizoł bez szyba. Siedzisz i bajstlujesz jakiś ruszające serduszka..., my sie ze starkom poznoli w Jonkowicach przi Studziynce. Pochodziyli my se po świyrzym lufcie w lesie, serce to żech kupiył z piernika, co se mogła przinajmnij pomaszkecić- , to było piyknie i zdrowo. Teraz po cołkich dniach przed putniom w doma siedzicie i przez droty zolycicie. No, na jedno jest to dobrze, bo przinajmnij gupot niy robicie, ale...co ci tam byda dalij kludziył, to przeca niy te czasy...
Komentarze