Cołko reszta, to rzeczy na jedyn roz . Starałach sie tyż policzyć, wiela bez cołki tydziyń wleciało roztomajtych opakowań do mojigo kibla na śmieci. Wyszło mi : kole sztyrdziyści małych nelonowych bojtlików, 3 miyszki, 12 krzinek po mlyku i sokach, dwie putnie papyndeklowe po proszkach do pranio, 2 pucinki z margariny, 5 flaszek plastikowych i 3 ze szkła. Ku tymu prziłożyłach jeszcze stusek poczytanych gazet. Jak żech se to pomnożyła przez wszystkich somsiadów w naszym familoku, to wyszła mi dość szykowno hołdka śmieci. No, a przeca takich familoków jak nasz, je na osiedlu wiyncyj. Potym niy dziwota, że pod wieczór wszystkie hasiokowe kastle som fol – tak fol, że aż wysypujom sie na ziymia. Wiater je potym rozdmuchuje po placu i trownikach.Niyjedyn powiy – To niy naszo wina, że chnet wszystko tego, co je w hasiokach to opakowania. Przeca w sklepach tak sprzedujom. Kosmetyki w tuplowanych pucinkach, sznitliki kyjzy – kożde ekstra łowinione w nelonik, a w szumnych bombonierkach coroz ciynżij znojść szekuladki miyndzy tymi wszystkimi papiórkami i plastikiym. Kupisz pół chleba – wrażom Ci go w nelonowy bojtlik, kołoczyk – to samo, konsek wusztu abo miynsa – bojtlik, pora nowych fuzekli – bojtlik i tak ze wszystkim za rajom. Je prowda, że te opakowania som teraz piykne i kolorowe. Reklamujom przi przileżytości kożdo pierdołka, kiero je w nie zapakowano. Downij zawijali towor w szary papior, kiery w doma spuczyło sie w kulka i wciepło do pieca na spolynie. Niy inakszy boło z flaszkami. Szło je sprzedać, abo wymiynić. Teraz widać wszyndzie pociepnione prozne plastikowe flaszki. Te ze szkła tyż leżom bele kaj potrzaskane na konski, bo żodnymu sie już na nic niy przidajom.A hasioki dziynnie pynczniejom. Auta – śmieciary niy nadonżajom z ich opróżnianiym. W końcu jednak kajś tam je wywiezom i straci sie nom z łócz tyn niypiykny widok, co jednak niy znaczy, że śmieci stracom sie blank – roz i na wdycki. Wszystkie te plastiki i nelony bydom tyczeć bez 300, 400 lot w ziymi, zanim sie blank rozpuszczom. Możno ani niy wiycie, ale som tyż takie diosectwa jak PCV, kiere sie wcale w przirodzie niy rozleci, a spolić gizdajstwa tyż niy idzie, bo wypuści do luftu jakieś sromotne trucizny. Tak tyż se myśla, że archeolodzy za jakie 500 lot bydom mieć co robić. Po naszych śmieciach spomiarkujom co my jedli, pili, czym myli zymby i do czego lulały nasze dziecka / pampersy/. Dowiedzom sie z nich jeszcze kupa rzeczy o nos, miyndzy inkszymi to, że były z nos ciaproki, bo dokumyntnie zaśmieciyli my Ziymio.Ale idzie tymu zaradzić już teraz. Kożdy, jak idzie kupować niych biere ze sobom swoja tasza abo koszyk, żeby potym niy przichodzić ze sklepu z narynczym nelonowych bojtli, bojtlików i tyteczek. Naszym dzieckom dowejmy pampersy yno na wyjontkowe przileżytości. Na bawełnianych pieluchach wyńdom dużo lepij – pryndzyj nauczom sie lulać do nachtopów, bo mokro pielucha na zadku bydzie ich szterować. Jak nic w tyj sprawie niy zrobiymy, to nastympne pokolynia utonom jak nic w śmieciach.
Komentarze