– Alojzku, je żeś nojstarszy ze wszystkich dziecek, w doma je biyda, pódziesz ty na służba do młynorza.A musza wom pedzieć, że piyrwyj słowo matki abo słowo łojca to były świynte słowa. Jak mamulka pedzieli, tak tyż się stało.W jedna niydziela do połednia przijechoł po mie pon młynorz bryczkom. Pożegnołech się ze wszystkimi, wsiedłech do bryczki i pojechołech w niyznane. Bez cołko droga młynorz łosprawioł mi roztomajte bery i bojki abo tyż groł na łorgankach. Kiedy przijechali my już do niego na plac, czekała na nos młynorzowo z piyknom cereczkom – jedynoczkom. Tyn piyrszy niydzielny łobiod u nich, na kerym były kury, gynsi, pultoki i zielone kaczki, śni mi się po nocach do dzisioj. Po łobiedzie młynorz mi pedzieli, że się byda mioł u nich dobrze. Musza yno dobrze się sprawować. Kozoł mi paść krowy i jeszcze pomogać przi gospodarstwie. Po tym zakludzioł mie do chlywa. Stoły tam dwa siwe konie, sztyry krowy, zaś we chlywikach kwiczały świnie. Przeszpacyrowali my się tyż na łąka. To tam miołech paść jejich krowy. Po drodze mijali my stow, na kerym pływało mocka gynsi. Zaszpanowoł mie tam taki obrozek – na jednyj gynsi siedzioł gonsior. A żech boł fest ciekawskim bajtlym, zaroz żech się spytoł młynorza, co te dwie gynsi robiom. Jakoś tak zaroz niy umioł mi łodpedzieć. Nojprzod poszkroboł się po palicy, a potym pomału wytuplikowoł, że ta gynś, co je na wiyrchu, mo złomano szłapa, zaś ta, co je na dole, przewozi jom na drugo strona stowu.Uszli my jeszcze dość konszczek, aż znodli my się na łące. Tam pasły się krowy łod inkszego gospodorza. Zaglondom, łoczyska przeciyrom, bo widza, że na jednyj krowie siedzioł byk. Zaś się spytołech młynorza, co te krowy robiom. Łon mi na to pedzioł, że ta krowa wlazła na ta krowa i łoglondo, kaj jest lepszo trowa. Jo pokiwoł głowom, co miało znaczyć, żech wszystko spokopioł. Kiedy szli my nazod, młynorz mi tyż pedzieli, ze radzi pijom piwo i gorzołka i że jak mie kedy młynorzowo pośle po niego, to musza wiedzieć, kaj ta karczma je. Toż poszli my jeszcze łobejrzeć karczma. Jak my ku nij dochodziyli, uwidziołech dwa skuplowane psy. Bołech ciekawy, co zaś łone pchajom. Spytołech młynorza. A łon mi na to:– Widzisz, synku, przed chwilom te psy wylazły z karczmy. Tyn jedyn już mo dość i ciągnie go du dom. Tyn drugi zaś jeszcze mo mało i ciągnie go nazod.Podobała mi się ta młynorzowo łosprowka, a jeszcze bardzij to, żech mog z nim wlyźć do karczmy. Łon pioł piwo, jo lemuniada.Na drugi dziyń wczas rano szoł żech z krowami na poszo. Krowy się pasły, a jo tyroł po łące, skokoł po krzokach, w rzyce na żaba raki żech chytoł. Za sztyry lata służby dostołech od młynorza miech mąki, świnia na zabicie i piykne łorganki. Mąka i świnia my zjedli, a łorganki mom po dzisiej.
Komentarze