Jedyn roz mamulka padała mi, co sie im w doma przidarziło ze świontecznym kołoczym jeszcze za „starej Polski”.
Moja starka Elza miała szczworo dziecek, starzik Johan czynsto dostowoł bezpłatne turnusy, bezto w doma biyda aż piszczała, a tu na Godni Świynta mioł przijechać starzikow łojciec, co go wnuki jeszcze nigdy niy widziały. Starzik Johan zabił łostatnigo krolika, a starka zagniotła ciasto na kołocz, ale ni miała co dać na wiyrch. Dostała konsek biołego syra łod ciotki Any, ale starczyło go yno na postraszyni, bezto pokładła miyndzy syr wielgaśne placki posypki. Wczas rano porynczyła starszym dzieckom, coby zaniyśli kołocz do piekorza Podstawki na Kościołek, a potym szła prać do kowolki. Piekorz nojprzod łobejrzoł, eli majom na kołoczu kartka ze mianem, a potym kozoł im czekać na łostatek, bo starczyn kołocz niy był masny i musioł iść do pieca ze kraja. Łodebrać go mieli kole połednia, ale łoni chcieli se polotać, bezto kozali iść młodszym bajtlom. Moja mamulka się już na zygarze znała i jak było jedna, szła ze Jozefkiym na Kościołek. We piekarni był yno młody piekarczyk i długo niy poradził tego kołocza znojść.
– Dziecka, ze czym żeście mieli tyn kołocz? – spytoł sie.
– Ze syrym panoczku a ze posypkom!
W końcu piekarczyk uwidzioł kołocz ze dekom, co stoł wele ściany. Miano sie tyż zgodzało, no to kołocz wydoł. Troszka było dzieckom dziwne, że ta blacha je tako ciynżko, że we dwoch niy poradzili i usmyczyć! Po drodze troszka uszkubali, coby było lżyj, a potym jeszcze w doma se wziyni pora razy po sznitce i ze kołocza łostała yno połowka.
Pod wieczor przilecioł piekarczyk a chcioł kołocz nazod. Na to szczyńści starka prziszła już do dom! Poszła ze tom resztowkom kołocza do piekarnie, a tam sie łokozało, że łon noleżoł sie bogatym gospodorzom ze Suszca, co sie tak samo mianowali. Starce chciało sie płakać, bo wszystki piniondze, co za cołki dziyń zarobiła, trza by było dać za szkoda, ale wszystek łobrociło sie na dobrze. Ci istni to byli przociele łod starzika Johana, choć starka ich niy znała a dali i jeszcze kołocz ze makiym, bo na świynta dycki piykli kołocze na rozdowek.
Komentarze