Przed łoni na kolyndzie Kozubkowe dziecka sie pochwolili, żeby chcieli mieć pod chojinkom prawo betlejymka. Nasz farorz, co rod bajstluje, padoł im tak:
– Mocie starzika artysty, co łobrozki maluje, to wom pomoże tyż tako betlejka postawić! Jo se myśla, żeby sie jaki konkurs przidoł, coby nagroda mogła dostać ta nojpiykniyjszo!
Farorzowi spomniało sie ło tyj godce dziepiyro, jak łońskigo roku tydziyń przed adwyntym spotkoł Kozubczyno:
– Farorzyczku, bydzie tyn konkurs? – pytała sie starka. – Bo mój już się biere za bajstlowani!
– Konkurs? Ja, bydzie! – zasztartowoł farorz. – Wszystek na rorotach łogłosza!
Potym prawie we kożdej chałpie coś tam starziki a bajtle rychtowali!
U Kozubkow starzik betlejka poskłodoł, dziecka piyknie jom pomalowali, a starka poszyła szaty do Świyntej Rodziny. Hanusia przeblykła Barbie we modro koszula, a na gowa zrobiła i bioły rombek ze etaminy, za to Wojtek ustroił świyntego Jozefa. Ze poczontku chcioł przeblyc swojigo Batmana, ale potym wzion Kyna łod Barbie. Co prowda, łon troszka za modo wyglondoł, ale jak mu przilepił broda, to wszystek było akurat! Starzik wyrychtowoł żłobek ze kartonu a nafilowoł go sianym i już szło kłaść Dzieciontko! Hanusia długo myślała nad tym, kero lalka bydzie Jezuskiym, bo jedne były troszka za wielgi, a drugie zaś za małe. Dziypiyro starka i pomogła a wybrała goluśkigo, gumowego bobaska. Trza mu było yno zrobić pieluszki ze flizeliny. Betlejymka była tako piykno, że wszyjscy w doma byli iści, że nagroda je już jejich, bezto dziecka wachowały, coby żodyn kamrat nic niy podejrzoł!
Zaroz po Świyntach prziszoł dziyń kolyndy! Porzykali, a farorz łobejrzoł, co tam starzik a dziecka społu postawili. Pokwolił szopka, Maryjo a Jozefa, ale jak się podziwoł na Dzieciontko, łoczy mu sie zrobiły wielgi jak piyńć złotych:
– Ło taki nowoczesnej aranżacji żech ani niy myśloł... – zaczon a wzion do rynki konsek patyka łowiniyntego elastycznym bandażym. Tam, kaj miała być gowa, był przilepiony taki uśmioty emotikon!
Kozubki niy mieli piyrszego miyjsca, ale Hanka dostała figurka Jezuska w żłobku na pocieszyni za lalka, co jom pogryzła jejich zazdrosno suka Dora.
Komentarze