Niydowno mieli my Godni Swiynta, a kożdy dostoł cosikej na Dzieciontko. Jo mom dycki ze tym umsztynda, bo jak dostana co do obleczynio, to je za małe! Jedyn roz chciałach wymiynić dość drogi szaty, ale wiynkszych ni mieli! Bezto ta paniczka we butiku mi poradziła, cobych se wziyna siwo jakla. Choć mi sie ze poczontku niy widziała, teroz rada w ni chodza!
Moja kamratka Maryjka dycki godo, że na gyszynk świonteczny abo urodzinowy to nojlepi kupić kosmetyki, bo to niby kożdy potrzebuje, ale jo mom w doma pora drogich parfinow, co ich niy umia ściyrpieć, bo za fest woniajom. Już słysza, jak godocie, że jo je zmierzło baba, ale spomnijcie se, eli wom sie tyż coś takigo niy przitrefiło?
Co to potym ze takim niyutrefionym, ale ze serca danym podaronkiym robić? Nikerzi godajom, coby go posłać kaj dalij, ale tego tobych niy radziła!
To było na poczontku łosiymdziesiontych lot, we sklepie małoco szło kupić, a my sie wybiyrali na piyndziesiontka do naszej ciotki Zofije. Fajer niy był wielgi, ale jakiś geszynk trza było wziońć. Mieli my dwa komplety kryształowych kieliszkow, bezto padali my se, że tyn nowszy, co mioł jeszcze szejść konskow, domy ciotce, ale przi myciu jo jedyn strzaskała, a było po gyszynku! Mój chopeczek, co kryształom niy przoł, spomnioł se, że momy jeszcze piykny wazon, co my dostali na piyrszo rocznica ślubu łod ujka Richarta. Wol niy wol, musiałach go dać, chocioż mie sie tyż widzioł! Ciotka ponoć była gyszynkowi rada, ale za jaki dwa lata dała go na ślubny podaronek naszej kuzynce Emilce, bo bezmała nic lepszego niy dostała kupić! Ta dziołcha dostała takich kryształowych wazonow aże piyńć, a było iste, że kery podzie kaj dalij. Potym jeszcze nasz wazon był aże we trzech miejscach! Isto chcecie wiedzieć, skond to wiym? Nasz kryształ mioł na spodku taki mały sztympel, co sie niy doł zmyć! Jak żech łońskigo roku na urodziny dostała taki som wazon połny kwiotkow, zaroz żech pojrzała na spodek! Nasz gyszynk prziszoł nazod, ale czasym se myśla, że to je tako rzecz, co rada wandruje a isto podzie dalij, bo zaś sie komu spodobo!
Komentarze