Starka Kurczyno pojechała do Rajchu ku swoji siostrze, co była fest choro. Skuli tego Feluś a Moniczka łostali w doma ze starzikiym Kurkom. Aga troszka sie boła łostawić śnim dziecka, bo dobrze pamiyntała wiela hibow nachytali ze bracikiym, jak tatulka szterowali, ale co miała robić: szkołki niy do sie łod rynki załatwić!
Starzik sie gibko ze bajtlami dogodoł, a nawet im kożdy dziyń łobiod nawarził, ale jak na ujma zaczły sie jakiś fusbale a relacyje śnich pokozowali dycki przed połedniem. Skuli tego starzik stracił zainteresowanie dzieckami a woloł łoglondać telewizor ze starym Matułom. Bajtlom nakroł chleba z marmeladom a musiały se grać same. Roz na to wlazła starka Matułka a sie łod proga rozprzezywała:
– Na, wy dwa stare grziby, co tak siedzicie pod telewizorym, a te piweczko słepiecie! Wy, Kurka, mielibyście wachować Agneszczynych dziecek, bo na poły sagi po placu lotajom, a je fest zima! Widać Aga łogupiała, że ich wom łostawiła. Isto zapomniała, wiela razy po dupie ze Danielym dostali za to, że wom w łoglondaniu fusbalokow przeszkodzili? Przijedzie wasza baba, to wom uszy przeszkrobie, ale jo was waruja, dejcie pozor na te dziecka, bo droga je blisko a niyszczyńścio niy potrza!
Starka jeszcze trocha pobuczała a potym szła do dom krowa dojić. Niy dała jednako pozor, że te jeji godki słyszoł Feluś. Zawołoł zaroz swoja siostrziczka, poszeptoł i cosikej do łucha a łoba sie kajś stracili.
Po meczu starziki sie rozłonczyli, a stary Kurka szoł szukać dziecek, ale nikaj ich niy było. Chodził, wołoł, szukoł po somsiadach i nic!
– Ponboczku, gdoś mi dziecka ukrodł, Aga mie zabije! – padoł na głos a rozpłakoł sie. – Ponboczku, jo ci wszystek dom, pultow chować niy byda, do kościoła poda kożdo niydziela, na telewizor ani sie niy podziwom, ale dej, coby te dziecka prziszły nazod całe a zdrowe... – szkamroł w duchu.
Potym zadzwonił do Agi a na policyjo!
Za ćwierć godziny dziecka sie znodły. Spały pod łożkiym we mamulczynej izbie. Prziznały sie, że chciały zrobić na bzdury starzikowi, bo słyszały, co padała starka Matułka.
Komentarze