No i momy teroz tyn karnawał. Ludzie po muzykach lotajom, bo radzi sie weselom. Kożdy chce potańcować, zanim przidzie tyn Wielgi Post. My, Ślonzoki, dycki przoli muzyce! Ponoć je yno jedyn norod, co ji przaje bezmała jeszcze wiyncy! To som nasze somsiady Czechy, bo godajom, że tam kożdy chop abo synek je muzykant!
Piyrwej tyż ludziska na te karnawałowe muzyki radzi lotali, a nojwiyncy mode dziołszyska! No bo kaj se miały jakigo szaca namówić jak niy na muzyce? Godało sie, że synek, co je do tańca, to tyż je do różańca. Mamulki dycki dziołchom przipominały: zapamiyntej se, jak sie ze karlusym zgodzisz we tańcu, to sie śnim zgodzisz i we życiu, bo inaczy jedyn idzie heta, drugi – cichi!
Jedyn łogromnie wielgi pampoń mioł cera jedynoczka. Wiano miała piykne, ale brocza ni miała, bo urody łod Ponboczka niy dostała, to co miała dziołcha robić? Łojcowie nakupowali i szatow roztomańtych a drogich strzewikow ze prawej a nojlepszej skorki, rożnorakich hutow a co tam jeszcze a niyciyrpliwie czekali na karnawał. Potym dziołcha wystrojili a poszli śniom na muzyka, ale tam yno ściany podpiyrała, a biydniyjsze łod ni tańcowały!
Mody panoczek ze majontku woloł wywijać ze dziołchami łod komornikow a łod ludzi ze dwora, ale łon swojigo mioł zatela, a ło żyniaczce ani jeszcze niy myśloł, zaś mody łorganista prziwiodł se jakoś gryfno miastowo frelka ze mamulkom. Młynorczyk mioł już downo łobrano Sobczykowo Katla, yno pamponiowo dziołcha ni miala żodnego! Z tej zgryzoty chop se popił, a nad ranym już fest nabelany wylozł na pojstrzodek tanecznej izby a zaczon wołać:
– Ludzie, co wy, śpicie abo co? Że wy moji gryfnej dziołchy niy widzicie!
Jak synczyska gruchli śmiychym, dziołcha łod gańby wyleciała z bekiym na dwor a pognała prosto do lasa, coby jom tam wilki zeżarły! Jednako po drodze chyciła plyjt, co sie wietrził na jakimś płocie, bo było fest zima! Jak sie rozwidniło, potkoł jom we lesie jakiś cudzy myśliwiec, co se chcioł zastrzelić sornika, ale dziołcha zwierza łobroniła. Łogromnie mu sie skuli tego spodobała, bo miała dobre serce. Wiela ani ku niy chodził, bo jeszcze przed Wielkanocom dali na zapowiedzi.
Komentarze