Łońskigo roku na wiosna prziszoł ku nom jedyn chop, co chcioł sy mnom godać, ale niy wiedzioł, jak sie mianuja, bezto łod furtki wołoł:
– Zawołejcie ta hrubszo baba!
Prawie na zegrodce był mój bracik, co tyż do tych nojciyńszych niy noleży, a ni mo rod, jak gdoś tak godo, a łodpedzioł mu tak:
– Panoczku, jo niy wiym, ło keryj godocie, bo sam miyszko yno jedna baba!
Chopu sie gupie zrobiło, a potym sie tłumaczył, że nic złego se niy myśloł.
Jo żech sie tyż roz wkurziła na tako modo baba, co padała malutkimu syneczkowi:
– Ta wielgo pani cie zebiere! – a pokozała palcym na mie.
Padałach i, żeby sie miała gańbować taki gupoty godać, bo po piyrsze: jo dzieckom przaja, a po drugi: już łod małego uczy bajtla, że hrubsi ludzie som gorsi łod inszych!
Ludzie jynzorym mielom, a ani niy majom pomyślonku, że jejich godki drudzy niyradzi słuchajom, bo że gdoś je hrubszy, to bezto ni ma gorszy abo gupszy łod tych akuratnych.
Nojlepi by było schudnońć, ale niy kożdymu to sie powiedzie! Na świecie bezmała hrubych ludzi przibywo, ale łachy a strzewiki ciynżko majom kupić. Do busa niy wlezom, bo sie zaklinujom skuli tego, że tak mało miejsca je miyndzy stołkami! Wszyjscy radzi sie śnich śmiejom, ale jakby trza było, cosikej do nich zrobić, coby sie im lekcy snami żyło, to kożdy myśli se, że to niy som jego starości! Bezto mondrzi ludzie wymyślili Dziyń Puszystych, ale niy wiym, eli to co pomoże, bo ludziska majom tako szpetno fanta, że jak gdo je inszy niż łoni, to mu zaroz jako łata prziszyjom, yno po to, coby sie sami poczuli lepsi!
Jo tyż noleża do tych „puszystych” a niyroz mi było gupie, jak żech sie tych złośliwości nasłuchała, ale teroz łod jakigoś czasu to wszystek spływo po mie jak po gynsi.
– Jak ci sie niy podobom, to sie na mie niy dziwej! – dycki se pomyśla na taki godki.
Mie sie tyż roztomańte chuderloki niy widzom, ale nojprzod przidzie mi do gowy, eli tyn człowiek ni ma na co chory? A nawet jak sie przekonom, że je taki skuli swoji gupoty, to tyż na głos ło tym niy łozprowiom!
Ni ma ważne, eli my som chudsi abo hrubsi, ważne je, coby my zdrowi byli!
Komentarze