Człowieka dycki kajś we świat ciongnie, jak sie yno po zimie troszka rozciepli. Jo tyż ni ma lepszo, bo jak sie troszka łozielyni, to rada wyłaża na dwor, coby sie tego wiosynnego luftu nadychać! Popatruja, eli już rosnom gynsi pympki abo podbioł żołto kwitnie, a serce mi sie śmieje, jak widza, że na łolszy, co sie sama zasioła wele naszego płota, som już rube, zielone ponczki. Nasiyni musiały sam prziniyść jaki ptoki, bo my miyszkomy na suchej górce, a łolszow szyroko-daleko ni ma!
Ale dziepiyro we moju ciongnie mie na wandrowani. Czynsto namowiom mojigo chopeczka na wycieczki. Rada jeżdża na wiosna do lasa poszpacyrować, a potym pod koniec czyrwnia tyż czasym trocha jagodow nazbiyrać do „dziurawego gorczka”, bo na normalne zbiyrani ni mom trwanio, a kompotow ze borowek isto u mie niy znojdziecie!
Nikedy bez długi weekendy wyskoczymy se ze mojim ślubnym troszka świat pozwiydzać. Byli my już we Ogrodzieńcu, we Tęczynie, we Ojcowie a we Cieszynie. Wszyndy je piyknie, ale we swoji chałpce nojlepi! Bezto staromy sie dycki być na wieczor w doma, bo tam czeko na nos cołki nasz dobytek: dwa psioki a dwa koty!
Jak nastanom feryje, zaczynajom sie chyce, a to je taki czas, co go nojlepi przeleżeć we ciyniu pod stromym abo pod zegrodkowym paryzolym, a ku tymu jeszcze ze zimnym piciym pod rynkom. Jakby tak jeszcze szło nogi kaj pomoczyć, to by był już czysty luksus! Bez lato moj chop rod jeździ ku wodzie, rybow niy chyto, ale rod se popływo. Jo tego niy poradza, bezto do wody wleza yno pod kolana, bo głymbi sie boja. Za to dycki se postawia rozkłodany zesel we ciyniu. Niy łopolom sie, bo ni mom rada, łod tego czasu, co żech sie fest spoliła. Musiałach sie potym pantynolym mazać bez cołki tydziyń. Jednako we tych wyjazdach je coś, czego niy do sie kupić za żodne piniondze: tyn szum wody, co uspokojo nerwy! Niy wierzicie? To poprobujcie sami!
A potym przichodzi podzim, tyn prawy, kiej świat sie miyni roztomańtymi barwami! Lasy a parki ze zielonych robiom sie czerwione a żołte. Ptoki flugujom do ciepłych krajow, a mie je wtedy łogromnie żol, że jo ni moga lecieć śnimi, isto żeście to chocioż roz poczuli?
Komentarze