Starka Kracliczka wybrała sie ze swojom familijom do supermarketu. Mieli kupić jaki miynso na świynta a troszka przewarzideł, ale jak yno wlyźli miyndzy sztandy, cołkiym ło tym zapomnieli a nakupowali roztomańtych rzeczy, co ani ni mieli we planie, a wszystek bezto, że starka łostawiła kartka ze listom towaru w doma na stole. Na koniec spomniało się i, że miała kupić sztuczne kwiotki swojimu chopu na grob, a ze bajtlami poszła na drugi koniec sklepu, kaj stoły wazony ze jedbownymi lelujami, narcyźlami, storczykami a rożami, a jedne piykniyjsze łod drugich.
– Babciu, kupimy taką kolorową palmę? – poprosiła Zuzka a pokozała na kiblik, co w nim stoły taki gryfne palmy ze suszkow.
– Ale dziołcho, to niy som nasze palmy, to skondś ze daleka prziwioźli! Jo już mom na nasza pronci przirychtowane...
– Ale taka palma jest ładna, kolorowa! – upiyrała sie Zuzka.
– Jo ze takom palmom isto do kościoła niy poda! Musiałabych sie łod gańby spolić przed somsiadkami! – łodpedziała wkurzono starka.
– Ale babciu... – napiyrała sie dalij Zuzka.
– Jak ci mamulka tako kupi, to se jom do kościoła wziońć możesz, ale mie i potym do niysiynio niy wciskej... Bierymy sie do dom a fertik!
We sobota starka palma naszykowała a w niedziela rano niy poradziła i znojść, jakby sie pod ziymia zapadła! Jeszcze we wieczor stoła we zbonku na stole pod łoknym, a rano yno prożny zbonek łostoł! Piyrsze wyleciała starka z gymbom na dziecka, że i palma kajś skowali, ale te zrobili machy jak aniołki a padali, że nic ło tym niy wiedzom, a czasu na śledztwo niy było.
– Iść do kościoła bez palmy to je gańba! – pomyślała se starka. – Lepszo kupno palma niż żodno! – a wziena do kościoła swoja wnuczka Zuzka, co niosła palma ze marketu.
Dziepiyro wieczor Zuzki ruszyło sumiyni a prziznała sie starce, co rano nazgłobiała. Chciała podłożyć do zbonka swoja palma a starczyno kajś skować, yno niy wiedziała, kandy jom styrczyć. Bez łokno uwidziała, że po placu łazi jejich koza Gryjtka. Teroz stykło yno łokno łotworzić a było po starości!
Dziołcha musiała godać prowda, bo łogryziono resztkowka starczynej palmy rychtik leżała na grzondce pod chałpom.
Komentarze