Na podzim Szymon łod Molendow napoczon chodzić ku młynorzowej Jewce. Dziołcha niy była już nojmłodszo, ale wiela ji rychtik było lot, żodyn niy wiedzioł, bo chodziła po pańsku. Jak sie sam przikludziła ze łojcami, to była już dość szykowno, bezto teroz musiała mieć wiyncy jak dwaścia piyńć lot, ale żodnymu to niy wadziło, bo była jedynoczka a miała wielgi wiano.
Teroz cołki czos Szymon wysiadowoł we młynie, ale kamraty dali mu skozać, coby prziszoł do kaczmy, bo muszom mu coikej ważnego padać. Jak yno wlozł, zaroz go łobskoczyli a zaczyni sie pytać, jak mu sie frela widzi.
– No, co? Nic i niy brakuje!
– A tyżeś je isty, że to je baba? – wypolił Ecik.
– Przeca łoczy mom a widza! – wkurził sie Szymon. – Siedzieć na czym mo, a dychani tyż niyliche wyglondo!
– A widziołeś jom bez tych łaszyskow? – spytoł sie Lojzik, nojlepszy Szymkow kamrat. – A widzisz! Paulek Kieca, co robił we młynie, godo, że Jewka je chudo jak sztynder a plaskato jak deska!
Potym jeszcze kamraci zaczli radzić Szymkowi, jak mo jom wyprobować, ale łon już tego niy słuchoł, yny prasnoł dźwiyrzami!
Dalij chodził ku Jewce, ale dziołcha widziała mu sie coroz myni, a niy był już taki isty, eli i jeszcze przaje.
Synczyska namówili Szymkowo siostra, Milka, coby sie spotkała ze Jewkom we Pyndziałek Wielkanocny po sumie a wykludziła jom aż na mostek na rzyczce, niby skuli tego, coby sie podziwać, kere synki bydom dziołchy wodom łoblywać. Tam Szymkowi kamraci chycili Jewka a wciepli jom we szatach do rzyczki. Milce tyż gowa zatonkali, coby niy podpadła. Na to prziszły dziołchy z jejich wsi a zrobiły straszne larmo, bezto Szymon, co czakoł na Jewka wele fary, tyż za kwilka był na moście. Boroka Jewka już się zbiyrała ze wody: łachy wisiały na ni jak na sztyndrze, a ze zadku i tyrczoł taki wielgaśny zegłowek. Lojzik udowoł, że chce i pomoc i poszarpł frela za warkocz, a łon mu we gości łostoł. Tego już Szymek niy zdzierżył, yno strzelił prosto ku chałpie.
Na bezrok wzion se ta najspaśniyjszo dziołcha ze wsi, ale miodu przi ni mioł, bo sie sztyjc śnim wadziła. Jewka wydała się zaroz na Godni Świynta a wziena se Lojzika. Łod tego czasu synki już niy kamracili!
Komentarze