Niedowno przijechoł nazod do Polski synek łod Bynusia Gagle. Tyn mody siedzioł już pora lot we Stanach u ujka. Robota mioł fajno, piniyndzy tyż se troszka łodłożył, a zamiarowoł łostać tam na stałe, ale łostatnio fest go do dom ciongło, bo poznoł we Ameryce frelka, co była rodym ze Bytomio. Łona tam przijechała sie szkolić, a jak sie i kontrakt skończył, to mazała gibko do dom! Padała, że niy zamiyrzo cołki życi być „aszputel” łod Amerykonow, bo po to we Polsce sztudyrowała, coby we szkole dziecka uczyć! Dziepiyro wtynczos Wojtek se przipomnioł, że łon tyż mioł taki plany, ale ich pociep, jak ujrzoł dolary!
Niy dali jak we strzoda synek spotkoł sie ze swojim nojlepszym kamratym Adryjanym, co był już delszy czos na bezrobociu, bezto mioł kupa frajnego czasu. Wojtek potrzebowoł jakoś mało tajla do łojcowego mopika, co go już dwa dni naprowioł, a poszli łoba na torg kupić jom u „ruskich”. Yno, że na torgu za te pora lot fest sie zmiyniło. Budy nowe postawili, a teroz w kożdej co inszego sprzedujom. Wyglondało na to, że sam majom wszystek, ale tyj szajby do motorka Wojtek niy kupił! Już mioł padać, że we Stanach to by mu sie niy przitrefiło, ale Adryjanowi spomniało sie, że na końcu placu stoji czasym chop ze takim „miszmaszym” a kamrata tam zakludził. Szajba, co jom Wojtek potrzebowoł, leżała na plandece na ziymi. Sprzedowacza niy było, ale za moment prziszoł ku nim mały, chudy „chińczyk”, padoł „dobry” a stanoł se z boku.
– Wiela to kosztuje? – spytoł sie Wojtek, a „chińczyk” nic, yno sie łośmioł a nic niy łodpedzioł.
– Wiela to kosztuje, chopeczku? – znerwowoł sie Wojtek, wzion do rynki tajla a wsadził handlyrzowi pod nos, a łon dali nic.
– Coś mi sie zdo Adryjan, że śnim trza po światowymu: hał macz is it? To po angielsku znaczy: wiela to kosztuje...
– Dwacia złoty, pan... rozumi... ile to kosztuje, pan? – rozgodoł sie „chińczyk”.
Wojtek był rod, że sie noreście dogodoł, a padoł kamratowi:
– Widzisz chopie, ucz sie, bo angielski to podstawa!
– Wojtek, ty d... stropiono, jakbyś zaroz po polsku do chopa godoł, tobyś tyj podstawy ani znać niy musioł! – łodżarł sie Adryjan.
Komentarze