Hańdowni ludzie wiyncy dziwali sie na to, co sie wele nich dzioło, a poradzili wywrożyć pogoda do przodku. Już bez lato wiedzieli, jako bydzie zima, a bez zima, co prziniesie wiosna a lato!
Jak we drugi połowce lipnia zaczły sie rano pokozować mgły i zamiast łopaść rosom na ziym, po wschodzie słonka podźwigły sie do gory, znaczyło to, że gibko przidom śniegi. Tak było łońskigo roku, kiej pod koniec września śniyg spodł we gorach, co do nich niy momy ani tak daleko.
Zaś we siyrpniu, jak bez dziyń był chyc, a we nocy wybrane niebo to wrożyło, że bez zima bydom siarczyste mroziska. Ludzie liczyli wiela takich dni przipadło w cołkim miesioncu. Kiej ich było poła abo i wiyncy, to sie szło spodziywać prawej zimy stulecio!
Ważne tyż było, kiej ptoki łodleciały do ciepłych krajow. Jak sie gibko uwinyły, to był znak, że podzim bydzie krotki a zima przidzie wartko. Starzi ludzie godali tyż, coby se dać nadzwyczoj pozor na jaskołki. Jak długo sie zbiyrały, siodały na drotach a rajcowały fest przed drogom, znaczyło, że długo jeszcze bydzie piyknie a ciepło, ale jak sie straciły z dnia na dziyń, to wrożyło yny jedno: lato gibko sie skończy, rychło nastanie podzim ze deszczym a wiatrami a jeszcze we październiku abo poczontkiym listopada przidzie zima ze mrozym, ale bez śniega!
Mój starzik, co był fesztrym, dziwoł sie dycki po lesie a godoł tak: Jak mo być łostro zima, to dziki zwiyrz roz-dwa sie wylyni a gibko dostowo nowego kożucha! Kiej lyska sie łożołci, ale listki trzimie, to piykno pogoda bydzie delszy czos, zaś jak domb łoczrwiynieje, ale listkow niy ściepnie, to zima bydzie sucho a libeźno!
Tak to se ludzie przewidywali naprzod pogoda, jak jeszcze ło meteorologiji żodyn niy słyszoł!
Jo tyż dałach pozor na taki jedyn znak: jak sie na podzim wele naszyj chałpy pokożom sojki, to do tydnia momy na bank mrozik abo czasym i śniyg!
Komentarze