We biurze robiłach ze paniom Malkom, co była yno troszka młodszo łod moji mamulki. Kamratki mie żałowały, że musza siedzieć ze starom babom, ale jo była tymu rada, bo jedna my sie na drugo niy łoglondały a kożdo robiła, co do ni noleżało. Jak szefa niy było, to my se tyż czasym pora minut poklachały.
Roz mi łopedziała, jak mamulka łod chopa jom wypróbowała, eli sie nadowo na niywiasta. Zaprosiła Malki na niydzielny łobiod. Kozała synkowi, coby prziwiodł swoja lipsta wczas rano, bo szło ło to, że modo miała tyn łobiod sama nawarzić, jak wszyjscy podom do kościoła! Porynczyła dziołsze, coby narychtowała czornych a guminianych kluzek i modrej kapusty, potym uwarziła dobrej zupy ze swojskimi nudlami a na koniec łupiykła gynś, co jeszcze po placu lotała. Jak wszyjscy poszli, to Malka siadła se na stołek a sie rozbeczała, ale zaroz potym chyciła gyńś a pognała do somsiadow. Somsiod gyńś zarżnoł, ale łoszkubać jom musiała sama. Myślała, coby gyńś łoparzić, jako to mamulka ze kurom dycki robiła, ale somsiadka i padała, że musi jom leko bez szmata pobiglować ciepłym zieloskiym, to piyrze do sie leko wytargać. Czas gibko uciekoł, a dziołcha musiała jeszcze zrobić kluzki a nudle. Praje myślała, za co sie nojprzod wziońć, kiej przileciała do dom siostra łod jejigo szaca.
– Wiysz, Malka – padała – jo zrobia te nudle, ale mie przed mamulkom niy wyzdrodź, bo jo sie boja, że jak tak dali podzie, to mój bracik wcale sie niy łożyni!
Malka sie ani niy prziznala, że kluzki robi piyrszy roz sama, bo tak to sie yno dycki dziwała, jak robiła ich mamulka, ale uwinyła sie roz-dwa i jak familijo prziszła ze kościoła wszystek było już gotowe.
Prziszło szwigermuter kożde jodło spróbowała a padała tak:
– Teroz dziołcho posłuchej, co za felery robisz: zupa je zapłono, miałaś do ni dać drobka, a te wszystki zielone farfocle wyciongnońć, kapusta – zamało kwaśno a bez korzyni, gyńś zasucho a zatwardo, isto, żeś jom niy podlywała, a te kluzki som taki twarde, że jakby ciepnońć nimi bez stodoła, toby sie niy rozwaliły, yno nudle mosz dobre! Bezto se myśla, że możecie sie łożynić nojpryndzy na bezrok, jak cie twoja mamulka warzić nauczy!
Komentarze