Jak moja oma była piyrszy roz we Rajchu, prziwiozła mu wielgo tuba krymu do golynio, bo to tam było fest we modzie. Ujek woloł sie golić mydłym a pyndzlym, co go jeszcze mioł po tatulku, ale podaronek łod naszej omy trzimoł na zdrzadle we łaziynce, coby insi widzieli, że je człowiek światowy! Jedyn roz golił sie ujek przi łoknie we kuchyni, bo mu we łaziynce byrna strzeliła, a łon mioł mokre rynce, bezto ni mogł i wymiynić. Łoroz patrzi, a łod furtki ku chałpie depto jego kamrat Jozef, co tyż był farorzym. Ujek Ziga gibko skończył golyni a jak sornik skoczył do łaziynki, zrobił se na gymbie piana prosto ze starczynej tuby, a za momynt wylozł taki namydlony z kamratym sie prziwitać. Padoł mu, że zaroz kończy, chycił ryncznik a gymba se wytarł.
A to sie ksiondz Jozef dziwowoł: Styknie gymba namazać, kwilka poczekać a kudłow na brodzie ni ma! Onymu to by sie rychtik przidało! Niy musiołby tak wczas stować na ranno mszo, mogłby se dłużyj pospać, bo tako kryma to czas łoszczyndzo! Ani mu niy podpadło, że Ziga coś za gibko chcioł sie śnim takom dobrociom podzielić.
– We tym Rajchu to łeb majom! – myśloł se ksiondz Jozef, kiej sie we niydziela rano mazoł Zigowom krymom, potym yny sie wytarł do ryncznika a polecioł do zakrystyje, bo już było poźno! Kościelny dowoł mu jakiś znaki, ale do farorza to dziepiyro dotarło, jak był przi ołtorzu, tak fest sie śpiychoł.
– Po mszy musza sie go spytać, ło co szło? – padoł se w duchu a dalij łodprawioł.
Przi komunije zdało się farorzowi, że parafijany jakoś dziwnie na niego popatrujom. Jedna modo baba prziszła ze takim malutkim bajtlym, co mu może ze trzi lata było. Syneczka postawiła wele siebie a klynkła do balaskow. Kej była jeja raja do komunije, maluśki sie rozwrzeszczoł:
– Jo niy chca do miecha, jo niy chca do miecha! Tyn stary dziod niygolony isto mie zebiere!
Ksiondz Jozef pomacoł sie po gymbie, a już był w doma!
Jeszcze we zakrystyji pomstowoł na ujka Zigi, ale potym mu łodpuścił. Som se przeca był winiyn, bo niy rod stowoł.
Komentarze