Łońskigo roku było dość pora dni wielgigo chycu. W tynczos przi godce prziszli my ze chopeczkiym na to, że downo nad Wisłom my niy byli, a teroz by nom to nojlepij pasowało!
Padali my se, że wyjadymy w niedziela ło siodmej rano, ale lekcy pedzieć niż zrobić! Wykulali my sie ze chałpy dziepiyro ło poł dziesiontej. Na drodze był już łogromny ruch: auto jechało za autym, a co kwila trza było stować, bo droga była we przebudowie, bezto bez poł godziny ujechali my yno piyńć kilometrow. Porzad trza było wachować swoji raje, bo żodyn niedzielny szofer drugigo niy przepuści! Przi takim chycu kożdy chce być jak nojpryndzy przi wodzie. Jak sie trefi jaki zawalidroga, to zaroz widać, że my som we Uni, bo insze użytkowniki drogi titajom na niego, jak porwane Italijoki, pokazujom po amerykańsku pojstrzedni palec abo klnom siarczyście po polsku!
Noreście po dwoch godzinach mogli my se zadki pomoczyć, ale jeszcze nojprzod trza było postawić auto we ciyniu a to ni ma tak łaps! Słońce sztyjc sie krynci po niebie i tam, kaj rano był ciyń, kole połednia je chyc jak na Saharze. Ło tyj porze nad rzykom co lepsze miejsca były już pozajmowane, ale konsek miejsca na naszo deka my jednako znodli. Z jednej strony mieli my familijo ze piyńcioma szkolorzami, co sztyjc robili jakiś gimnastyczne konsztiki a co kwila landowali na naszych plecach, co my wystawiali do słoneczka. Ze drugi – siedzieli dwa chopy ze grilym a piwym. To, że wusztym zaczło woniać, jak my już downo wszystek zjedli, to jeszcze szło zdzierżyć, ale jak sie zaczło na nas kurzić, to my sie ło mało co niy podusili, bezto chocioż godzina była jeszcze modo, brali my sie wartko do dom! Powrotno droga była gorszo niż tam, bo bez mała dwa „wypasione” auta dały se dziobka na krziżowce pod Żorami. Skuli tego we jednej kwili zrobił sie taki bajzel, że policyjo musiała pokierować reszta autow łobjazdami bez wioski. Nazod przijechali my tacy strasznie umordowani, że potym bez dwa dni my sie flyjgowali na zegrodce.
Powiydzcie sami, po co jechać w taki goronc telki światy, jak momy pod rynkom taki wygody: ciyń pod stromym, nadmuchiwano leżanka a zimne piwo we lodowce!
Komentarze