We dwadziestych latach moje starziki najyni se konsek ziymie na działkach wele gimnazyjum. Starzik Johan potrzebowoł pora lot, coby tam zrobić porzondek, bo tam yno same bażoły były. Wszyjscy sie dziwowali, że sie mu powiodło wyrychtować tako piykno zegrodka we miejscu, kaj ani trowa niyrada rosła! Potym posadził na gorce trzi stromiki ze łowocym, a wele przikopy pora krzy wieprzkow a świyntojonkow. Ze zadku za nimi rosnoł rabarber jak baty! Na pojstrzodku starka miała rabatka na kwiotki a na cołki resztowce sadzili gymizy a troszka wczaśnych kartofli. Woda do podlywanio dycki brało sie ze przikopy, ale we piyndziesiontych latach było z tym coroz gorzi, nejści wyschła. Bezto zarzond łogrodka przikludził woda ze miasta a postawił trzi basyny ze betonowych ringow a przi nich kokotki. Ponoć skuli tego na działkach zalong sie utopek. Starym sie małokedy pokozywoł, ale dziecka rod wobił ku wodzie, chocioż żodnego niy utopił, bo we tych basynach dycki było yno troszka wody na dnie. Roz jedyn, jeszcze za bajtla, samach do takigo wleciała, jak żech se chciała rynce umyć!
Jednego roku ludzie zaczli godać, że na działkach straszy czorno świnia, a pokazuje sie dycki bez połednie, ale starka Elza tymu niy wierziła.
– Isto świnia sie wywarła jakimu działkowiczowi, co jom chowie we laubie, chocioż sie niy śmi! – padała.
Jedyn roz musiała iść na zegrodka przed połedniym, bo i brakło gymizy do zupy. Natargała, co potrzebowała, a brała sie gibko nazod, bezto była troszka niyrada, jak jom wele wrot zastawiły starki Hazelnuska a Dulymbino, co miała nojpiykniyjszo zegrodka ze cołkich działek, bo Dulymby tam sztyjc siedzieli a łobrobiali. Baby sie troszka zagodały a łoroz patrzom a tu pojstrzodkiym alejki sypie wielgo czorno świnia. Wparziła do Dulymbowego łogrodka a straciła sie miyndzy rzondkami kapusty! Starki sie łogromnie wylynkały, bo niy poradzily spokopić, jak sie tako wielgo świnia mogła rozpłynońć we lufcie. Jak tak medytowały, to zadzwonili na kościele na połednie, teroz to łone zaroz sie kapły, co to mogło być! Porzykały „Anioł Pański” za duszyczki czyśćcowe a rozeszły sie do chałpow.
Komentarze