Moja kamratka Cyjka była we Rajchu u swoji kuzynki Trudki. Ta baba miała łogromnie piykne, bioluśkie zymby. Cyjce sie tyż takich zachciało, ale jeji dyntysta, co do niego lata już chodziła, takigo gryfnego gybisu zrobić niy poradził. Bezto Trudka dała i adres slonski kliniki, kaj se ta szuflodka zrobiła. Jak yno Cyjka przijechała nazod, to prziszła do mie, cobych śniom tam pojechała, bo sama ni miała łodwagi sie tam puszczać.
Siadły my do busa a za trzićwierci godziny były my na miejscu. Klinika my znodły roz-dwa, ale jak żech uwidziała te marmurowe schody a łokna na poł chałpy, prziszło mi do gowy, że sam łacno niy bydzie, alech niy chciała Cyjki nerwować!
We pojstrzodku była tako recepcyjo jak poł naszej chałpy! Stoły tam trzi flyjgery, ale wcale na nos niy dały pozor, yno dali klachały. Jak im kamratka padała, że my som ugodane na czworto, to jedna pojrzała na nos ze wiyrchowiska a padała:
– No, to która z pań? Bo my hurtem nie przyjmujemy! Aha, a pierwsza wizyta kosztuje sto pięćdziesiąt złotych, mam pisać czy nie?
Te dwie szwestery, co stoły wedle, łobleciały nos łokiym z wiyrchu na doł, a miały przi tym taki machy, jakby żaba społkły. Widać my sie im niy widziały: Cyjka we szatach po Trudce, a jo we biołych galotach a laczkach, co wyglondały prawie jak od Dolce i Gabany, ale yno prawie!
Za kwilka prziszoł młody doktorek a wzion Cyjka do gabinetu, a co i tam padoł, to jo bez dźwiyrze słyszała, bo godoł tak głośno jak do jaki guchej.
Zombki i piykne łobiecoł, ale jak padoł, wiela sie bydzie musiała naciyrpieć, a na wizyty naprzijyżdżać, to mie na poczekalni nogi same zaczły lotać łod strachu!
Za piyńć minut upłakano Cyjka wyleciała na recepcyjo.
– Co sie stało? – spytałach sie wylynkano.
Kamratka rozbeczała sie na całego:
– Ty wiysz, co łon mi padoł? Że to bydzie kosztować trzidziyści!
– Nejści euro? Za jedyn zomb? – dopytowałach sie, bo cosikej mi to niy grało.
– Dziołcha łoprzitomnij! – wrzaskła na mie Cyjka. – Sam je Polska, sam we euro niy bierom! Trzidziyści ale tysiyncy!
Tego było na mie zatela, nogi mi sie ugiyny a padłach na ziym jak długo, a skuli kamratczynych zymbow kości żech se potrzaskała!
Komentarze